Попера “Увертюра” хамтлагийн залуус анхны цомгоо өлгийдөн авах гэж байна. Тус хамтлагийн шинэ цомогт “Өнө мөнх орон”, “Цагийн аяс” зэрэг залуусын дунд хит болсон арав гаруй дуунууд багтжээ.

“Удиртгал” нэртэй уг цомгоо тэд мэргэжилийн өндөр түвшинд, мэргэжлийн уран бүтээлчидтэй хамтран хийсэн гэнэ. Тэдний анхын цомгийн уран бүтээл дээр Урлагийн гавьяат зүтгэлтэн, хөгжмийн зохиолч Б.Шарав, Урлагийн гавьяат зүтгэлтэн Т.Сэр-од зэрэг монголын хөгжмийн ертөнцийн томчуудтай хамтран ажиллажээ. “Удиртгал” цомог энэ сарын 29-нд хэвлэлтнээс ирэх юм байна. Үүний дараа тус хамтлагийн залуус ирэх аравдугаар сарын 4-нд хуучнаар Ард кино театрын хойно байрлах Гавьяат жүжигчин Д.Сособарамын  “Од” театрт цөөн тооны үзэгчдэд зориулсан “VIP” тоглолт хийхээр бэлтгэлдээ оржээ.  Уг тоглолтын ерөнхий найруулагчаар Төрийн соёрхолт, Гавьяат жүжигчин Д.Сосорбарам мөн найруулагчаар “Анир” студийн найруулагч, Соёлын тэргүүний ажилтан, хөгжмийн зохиолч А. Алтанхуяг нар ажиллаж байгаа гэнэ. “Удиртгал” цомог болон тоглолтынхоо дараа “Увертюра” хамтлаг хоёр дахь бие даасан “Mongolian pop opera” цомгийн ажилдаа орох нь ээ.