АНУ-ын Нью-Йорк хотын “Heritage Auctions”-ын 2012 оны тавдугаар сарын 20-ны өдрийн дуудлага худалдаагаар 1.052.500 ам.доллараар зарагдсан үлэг гүрвэлийн яс нь Монгол орны Хожуу Цэрдийн Нэмэгтийн цаг үеийн “Тринозаурс батаар” болохыг Монголын болон олон улсын эрдэмтэд тогтоосон.

Уг олдворыг Монгол Улсын хилээр хууль бусаар гаргасныг Мөрдөн байцаах газар Эрүүгийн хуулийн 175.3-т заасан “Эд зүйл улсын хилээр хууль бусаар нэвтрүүлэх”, 150.3 дугаар зүйлээр “Бусдын эд хөрөнгийг завшиж, үрэгдүүлэх” гэдгээр эрүүгийн хэрэг үүсгэн шалгасан. Үлэг гүрвэлийн ясыг эзэмшигч АНУ-ын иргэн Эрик Прокопи нь Монгол Улсад удаа дараа ирж, Монгол Улсын иргэн, сэжигтэн Т, Б, О, Ө нартай бүлэглэн хууль бусаар палеонтологийн хайгуул хийж олсон олдворуудыг улсын хилээр хууль бусаар гаргасан аж.

Эл хэргийн сэжигтэн Т, Б нар нь үлэг гүрвэлийн ясыг хууль бусаар малтлага хийн олборлож байсан АНУ-ын иргэн Эрик Прокопитой холбоотой болохыг нотлох баримтаар тогтоон, сэжигтэн Б, Ө нарт цагдан хорих, таслан сэргийлэх арга хэмжээ авч мөрдөн шалгаж байна.