Намрын налгар шар өдрүүд хоног хоногоор хумигдсаар л. Ус цаг уурын хүрээлэнгээс ирэх өдрүүдэд цаг агаар сэрүүсч, уулархаг газраараа нойтон цас орж магадгүй гэсэн мэдээлэл өгч буй. Гэтэл ургац хураалт улсын хэмжээнд 30 хувьд ч хүрэхгүй байгаа  бөгөөд цаг агаарын гэнэтийн хүйтрэлээс болж цасан даруулчих вий гэсэн эмзэглэл ч иргэдийн дунд байна. Монголчууд ургацаа хурааж амжилгүйгээр цасанд даруулж байсан гашуун сургамж бий. Халуун зунаар зарим улс орнуудад үер ус, байгалийн гамшиг нүүрлэж, үүнээс болоод ургацаа алдсан бөгөөд дэлхийд дахинд хүнсний хомсдол нүүрлэж магадгүй гэсэн яриа ч тархаж байна. Тиймээс Үйлдвэр худалдааны яамны мэргэжилтэн Г.Одонхүүгээс  ургац хураалтын байдал ямар байгааг сонирхсон юм.

-Ургац хураалтын байдал ямар байна. Энэ намар ургац хураалт харьцангуй хожуу эхэллээ. Уг нь наймдугаар сарын 15-наас ургац хураалтын ажил эхэлдэг байсан биз дээ?

-Тийм ээ,  уг нь жил бүрийн наймдугаар сарын 15-наас ургац хураалт эхэлдэг байлаа. Энэ жилийн хувьд ургацын болц удааширснаас ургац хураалтын ажил хожуу эхэлсэн. Яагаад ургац хураалтын ажил хойшилсон бэ гэхээр зуны турш хүйтэн бороо орсон, сэрүүхэн зун болсонтой холбоотой. Одоогийн байдлаар улаан буудайн хураалт улсын хэмжээнд 18.3 хувьтай байна.

– Төмс, хүнсний ногооны хураалтын явц хэр байна. Хураалт нь нэлээд эрт эхэлсэн байх аа?

-Төмс, хүнсний ногооны хураалт сайн байгаа. Өнөөдрийн байдлаар 70 гаруй хувьтай байна. Ирэх сарын ихээр төмс, хүнсний ногооны хураалтын ажил бараг дуусчих болов уу. 

-Энэ жил хичнээн тонн ургац хурааж авахаар төлөвлөж байгаа вэ. Дотоодынхоо хэрэгцээг зуун хувь хангах боломж байгаа юу. Байгалийн гамшгаас болоод дэлхий дахинд хүнсний хомсдол  нүүрлэнэ гэсэн яриа байгаа шүү дээ?

-Бидний тооцоолсноор улсын хэмжээнд  нийтдээ 468 мянган тонн улаанбуудай, 208.9 мянган  тонн төмс, 99,4 мянган тонн  хүнсний ногоо хурааж авах юм. Манай орны хувьд хүнсний хомсдол нүүрлэхгүй гэдэгт итгэлтэй байна. Атарын III аян хэрэгжүүлснээр Монгол Улс дотоодынхоо улаанбуудайн хэрэгцээг зуун хувь хангах боломжтой болсон.

-Ус цаг уурын хүрээлэнгээс удахгүй цаг агаар хүйтэрнэ гэдэг мэдээлэл өгөөд байна. Бүр зарим нутгаар цас орж магадгүй гэсэн. Монголчууд ургацаа цасанд даруулчихгүй хурааж авч чадах нь уу?

– Ус, цаг уурын хүрээлэнгээс уулархаг нутгаараа цас орж болзошгүй гэсэн мэдээлэл өгсөн. Бид тэр мэдээллийг нь тариаланчдад дамжуулсан байгаа. Ер нь цаг агаар хүйтрэхээс өмнө богино хугацаанд ургацаа хураах учраас техникийн найдвартай ажиллагаа маш чухал. Тиймээс аймаг, орон нутаг, болон тариаланчдад техникийн бэлэн байдал, найдвартай ажиллагаанд онцгой анхаарч, ач холбогдол өгч ажиллахыг үүрэг даалгавар болгосон.