Хүнсний ногоо худалдаалагчид “Ховдын алим” гэж хэрэглэгчдийг хууран, алим борлуулах болжээ. Энэ жил Баян-Өлгий, Ховд, Дархан-уул аймагт алимны тариалалт өмнөх оныхоос нэмэгдээгүй бөгөөд 10 орчим тонн ургац хураах урьдчилсан дүн гарсан байдаг байна. Алимны тариалалтын 90 гаруй хувийг Баян-Өлгий аймагт тариалдаг бол Ховд аймгийн Булган суманд  хувь хүмүүс жилдээ хоёр тонн орчим алим хураадаг бөгөөд энэ нь Улаанбаатар хотын зах зээлд нийлүүлэгддэггүй юм байна.  Тээвэрлэх бололцоо ч байхгүй талаар албаны эх сурвалж мэдээлсэн байна.

Харин есдүгээр сарын 15-ны байдлаар Монголын хилээр  2114 гаруй тонн алим орж ирсэн байдаг бөгөөд үүний 72 хувь буюу 1524 тн алимыг БНХАУ-аас нийлүүлсэн байдаг байна. Алимны нийлүүлэлт эрс нэмэгдсэн нь жимс худалдаалагчдыг бүтээгдэхүүнээ борлуулахдаа янз бүрийн арга хэрэглэхэд хүргэсэн байж болох юм. Иймээс “Шударга өрсөлдөөн, хэрэглэгчдийн төлөө газар”-аас Улаанбаатар хотын гудамж, талбайд  “Монгол алим”, “Ховдын алим” хэмээн нэрлэн, худалдаалж байгаа алимыг Монголын хөрсөнд ургаагүй, Хятадаас оруулж ирсэн болохыг сануулан, сэрэмжлүүлж байна.