Дэлхийн банкны Зүүн Ази, Номхон далайн бүсийн Дэд ерөнхийлөгч Памела Кокс Төв аймгийн малчдын амьдрал, ахуй болон, “нарны гэр” төслийн хэрэгжилттэй танилцжээ. Тэрбээр “Монголын хөдөөгийн хүн амын тал хувь буюу 500 мянган хүнийг хөнгөлөлтэй өртөг бүхий зөөврийн нарны системээр цахилгаантай болгох үйлсийг хийсэн нь хүүхдүүд үдэш хичээлээ хийж, гэр бүлээрээ зурагт үзэн, гар утсаа цэнэглэж, нүүдлийн ахуйгаа хадгалахын сацуу дэлхий ертөнцтэй холбогдох боломжтой боллоо. Бүхнийг хамарсан хөгжилд хүрэхийн тулд газар дээр нь бидний хэрэгжүүлж буй олон шинэлэг санаачлагуудын нэг нь энэ юм” хэмээн тэмдэглэсэн байна.

Түүнчлэн “Эдүгээ хоёр оронтой тоогоор илэрхийлэгдсэн өсөлтийн дүнд 2010-2011 онд ядуурал 39.2 хувь байснаа 29.8 хувь болж, 10 хувиар багасч, төр барих дээд байгууллагад өмнөхөөс олон эмэгтэй гишүүд сонгогдсоноор жендерийн асуудалд ахиц гарлаа. Гэсэн хэдий ч Монгол Улсын ядуурал хэвээр байна. Монгол хүн бүрт сайхан амьдрах боломжийг хэрхэн олгох талаарх асуудал гол байна” гэж үзжээ.

Дэлхийн банкны зүгээс Монгол Улсын эдийн засгийн өсөлтийг бат бөх гэж харж буй ч бүхнийг хамарсан тогтвортой хөгжилд хүрэхийн тулд уул уурхайн эрх зүйн орчныг нухацтай болгох, орлогын удирдлагын ил тод байдлыг хангах, хүн амын эмзэг хэсгийнхэнд үзүүлэх туслалцааг тасралтгүй үргэлжлүүлэх шаардлагатай тухай онцолж байна.