Монгол Улсын 2012 оны аварга шалгаруулах модон бөмбөгийн тэмцээн есдүгээр сарын 21, 22-нд Гачуурт дахь “Монгол Шилтгээн” цогцолборын модон бөмбөгийн талбайд боллоо. Тэмцээнд ХААИС, Дархан, Улаанбаатар, МУБИС, ТЭЦ-4, Дарханы ДЦС, Эрдэнэтийн ДЦС, “Хангарьд” спорт клуб, Эв-Эе, Зуунтайн холбоо зэрэг нийслэл, хөдөө орон нутгийн нийт 12 байгууллагын эрэгтэй 72, эмэгтэй 52 тамирчин цохилтын эмэгтэй, эрэгтэй ганцаарчилсан, баг, холимог хос, талбайн цохилтын тэмцээн гэсэн дөрвөн төрлөөр өрсөлдсөн байна.

Эрэгтэйчүүдийн цохилтын ганцаарчилсан төрөлд тэргүүн байрт 106 оноогоор ХААИС-ийн оюутан Ц.Баасанжаргал, дэд байрт 107 оноогоор “Ойгон нуур” энерги, эрчим хүч угсралтын компаний тамирчин Б.Баттулга, гуравдугаар байранд 113 оноогоор ХААИС-ийн оюутан Д.Даваадорж, эмэгтэйчүүдээс 110 оноогоор ШУТИС-ийн Дархан-Уул аймаг дахь салбар сургуулийн оюутан Г.Ижилцэцэг, 117 оноогоор ЦДҮС ТӨХК-ний төвийн бүсийн салбарын ажилтан Н.Долгорсүрэн, 121 оноогоор Дархан-1 багийн тамирчин Б.Хишигжаргал нар эхний гурван байрт тус тус шалгарч мөнгөн шагнал, медаль, өргөмжлөлөөр шагнууллаа.

Жил бүрийн тэмцээнүүдийн хувьд баг тамирчдын хамгийн оролцох сонирхолтой, шийдвэрлэх бөгөөд өрсөлдөөнтэй болдог тэмцээн бол талбайн цохилтын төрөл юм. Тус төрөлд ШУТИС-ийн Дархан-Уул аймаг дахь салбар сургуулийн оюутан Д.Мөнх-Оргил, Улаанбаатар-1 багийн тамирчин Г.Батмягмар, Хангарьд спорт клубын тамирчин Б.Алтанхүү, эмэгтэйчүүдийн төрөлд ХААИС-ийн оюутан Б.Цэрэндулам, ШУТИС-ийн Дархан-Уул аймаг дахь салбар сургуулийн оюутан Г.Энэрэл, Дархан-1 багийн тамирчин П.Хүслэнзаяа нар шалгарч медалийн эзэд болжээ.

Харин холимог хосын төрөлд ШУТИС-ийн Дархан-Уул аймаг дахь салбар сургуулийн оюутан Д.Отгонпүрэв, Н.Мягмарсүрэн /52 оноо/ алтан медаль, ХААИС-ийн оюутан Ц.Баасанжаргал, Б.Оюунтуяа /58 оноо/ мөнгөн медаль, Дархан-1 багийн Б.Ариунболд, Б.Хишигжаргал /60 оноо/ хүрэл медаль тус тус хүртсэн юм.

Багийн төрөлд эрэгтэйчүүдээс 214 оноогоор Ж.Загас дасгалжуулагчтай ХААИС-ийн баг /Б.Баянбулаг, Ц.Баасанжаргал, Д.Даваадорж, Б.Ариунсүх/, 230 оноогоор Г.Болдбаатар дасгалжуулагчтай Дархан-1 баг /Б.Мөнхбат, Б.Баттулга, Ч.Сугаррагчаа, Б.Ариунболд/, 234 оноогоор С.Батцоож дасгалжуулагчтай Улаанбаатар-1 баг /Б.Буяндалай, Г.Батмягмар, Н.Шинэбаатар, Д.Мөнхцог/, эмэгтэйчүүдээс 242 оноогоор Г.Болдбаатар дасгалжуулагчтай ШУТИС-ийн Дархан-Уул аймаг дахь салбар сургуулийн баг /Г.Энэрэл, Г.Ижилцэцэг, Ц.Баярцэцэг, Н.Мягмарсүрэн/, 255 оноогоор Ч.Сугаррагчаа дасгалжуулагчтай Дархан-1 баг /Н.Долгорсүрэн, Т.Хандсүрэн, Б.Хишигжаргал, П.Хүслэнзаяа/,  258 оноогоор ХААИС-ийн баг /Б.Оюунтуяа, Б.Мөнхгэрэл, Ж.Загас, Б.Цэрэндулам/ нэг, хоёр, гуравдугаар байрын эздээр тодорчээ. 

Байгууллагын нэгдсэн дүнгээр:

1. Ж.Загас дасгалжуулагчтай “ХААИС” /14 оноо/
2. Г.Болдбаатар дасгалжуулагчтай “ШУТИС-ийн Дархан-Уул аймаг дахь салбар сургууль” /16 оноо/
3. Ч.Сугаррагчаа дасгалжуулагчтай “Дархан-1” тус тус цом, мөнгөн шагнал, медаль, хүндэт өргөмжлөлөөр шагнууллаа.

Ийнхүү улсын аварга шалгаруулах тэмцээнээс шалгарсан тамирчидыг энэ оны 11 сарын 22-27-ны өдрүүдэд Тайвань улсад болох олон улсын тэмцээнд оролцох эрхтэй боллоо.