Суданы Ерөнхийлөгч Омар аль-Башир өчигдөр Африкийн хамгийн том үйлдвэрүүдийн нэгд тооцогдох анхны алт боловсруулах үйлдвэрийн үйл ажиллагааг нээжээ. Энэхүү үйлдвэр нь жилд 328 гаруй тонн цэвэр алт боловсруулах хүчин чадалтай юм байна. Түүнчлэн мөнгө боловсруулах бөгөөд түүхий эдээ дотоодоос төдийгүй Египет, Эритрей, Төв Африк, Чад зэрэг орноос татах аж. Шинжээчдийн үзэж буйгаар энэхүү үйлдвэр ашиглалтад орсноор тус улсын алтнаас олох орлого хоёр дахин нэмэгдэх гэнэ.  Үүнтэй холбоотойгоор өнгөрсөн сард Суданы Санхүүгийн сайд тус улс алт боловсруулах үйлдвэрээ ажиллагаанд оруулсны дараа алтны түүхий эдийг экспортлохыг хориглоно гэж мэдэгдсэн билээ.

Судан нь уул уурхайн асар их нөөцтэй боловч үйлдвэрлэсэн бүтээгдэхүүний хэмжээ нь хангалттай биш байдаг аж. Энэ нь тус улсад хууль бусаар гар аргаар олборлогчид их байдагтай холбоотой гэнэ.