Нийслэлийн Засаг дарга бөгөөд Улаанбаатар хотын захирагч Э.Бат-Үүл 2012 оны наймдугаар сарын 24-ний өдрийн А/532 тоот захирамжаар төрийн болон үйлчилгээний байгууллагуудын гаднах авто зогсоолын талбайн 80-аас доошгүй хувийг үйлчлүүлэгчдийн автомашины зогсоолоор ашиглах нөхцөл бүрдүүлэхийг дүүргүүдийн Засаг дарга нар, байгууллагын удирдлагуудад, зогсоолын талбайн ашиглалтад хяналт тавьж ажиллахыг Замын цагдаагийн газар, Нийслэлийн цагдаагийн газарт тус тус даалгасан билээ.   

Хотын захирагчийн гаргасан санаачилгыг Байгаль орчин, ногоон хөгжлийн  яам анхлан дэмжиж, хотын соёлыг хэрэгжүүлэхэд хамт олноороо үлгэр жишээ үзүүлэхээр шийдвэрлэсэн бөгөөд есдүгээр сарын 20-ны пүрэв гаригаас буюу маргааш өглөөнөөс эхлэн гаднах автомашины зогсоолын талбайгаа иргэд, үйлчлүүлэгчиддээ чөлөөлж өгөхөөр болсон байна. Иргэд “Үйлчлүүлэгчийн түр зогсоол-30 минут” гэсэн бичигтэй талбайд автомашинаа 30 минутаас ихгүй хугацаагаар байрлуулах бөгөөд заасан хугацаанд иргэн таны тус яамнаас авах үйлчилгээг түргэн шуурхай шийдвэрлэх боломжийг бүрдүүлэн ажиллах аж.