“Зууны мэдээ” сонины сэтгүүлч Д.Болормаад холбогдох хүний нэр төрд халдсан гэх хэргийг Сүхбаатар дүүргийн шүүхэд хэлэлцлээ. Шүүх бүрэлдэхүүн хэлэлцсэний эцэст  түүнийг “Мон-Уран” компанийн захирал, УИХ-ын гишүүн Б.Наранхүүгийн нэр хүндэд халдсан гэж үзэн Д.Болормааг хөдөлмөрийн хөлсний доод хэмжээг 61 дахин нэмэгдүүлсэн буюу 8.564.400 орчим төгрөгөөр торгох шийдвэр гаргасан байна.

Хуралд даргалагч шүүгчээр Ш.Төгсгэрэл, улсын яллагчаар Ш.Баярбилэг, Д.Болормаагийн өмгөөлөгчөөр Ц.Монгол, нэхэмжлэгчээр УИХ-ын гишүүн, “Мон Уран”-ы захирал  Б.Наранхүүгийн өмгөөлөгчөөр Б.Билэгсайхан нар оролцлоо. Хэргийг сануулбал, Д.Болормаа нь бага насны /дунд сургуулийн 14-15 насны сурагчид/ охидын онгон биеийг 400 ам.доллараар худалддаг, худалдан авдаг зохион байгуулалттай гэмт хэргийн сүлжээ байгааг бичсэн бөгөөд энэ хэрэгт “Мон Уран” компанийн захирал Б.Наранхүү холбоотой гэсэн юм. “Мон Уран”-ы Б.Наранхүүг өсвөр насны охидыг садар самуунд уруу татсан хэргээр шалгаж эхэллээ” гарчигтай нийтлэл “Зууны мэдээ” сонины 2010 оны 11 дүгээр сарын 8-ны өдрийн 267 дугаарт гарчээ. Энэ нийтлэлтэй холбоотойгоор “Мон Уран” компанийн захирал Б.Наранхүү нэр төрөө сэргээлгэхээр шүүхэд хандсан юм.