Европын хөлбөмбөгийн холбооны хамгийн нэр хүндтэй тэмцээн Аваргуудын лигийн 2012-2013 оны улирлын хэсгийн шатны тоглолтууд эхэллээ. Буурал тивийн хөлбөмбөгийн ногоон талбайд өнгөрсөн шөнө Аваргуудын лигийн А, В, С, D гэсэн дөрвөн хэсгийн эхний тоглолтууд өрнөсөн юм.

Монакод наймдугаар сарын 30-нд болсон сугалаагаар “D” группт багтсан Испанийн Эзэн хааны “Реал Мадрид” клуб болоод Английн Премьер лигийн өнгөрсөн улирлын аварга “Манчестер Сити” багийн тулаан олны анхаарлын төвд байсан онцлох тоглолт байлаа.

Мадрид хотын алдарт “Сантьяго Бернабеу” цэнгэлдэхэд болсон “Реал Мадрид” болоод “Ман Сити” багийн тоглолтын үндсэн цагийн сүүлийн минутад дэлхийн хамгийн үнэтэй хөлбөмбөгч Криштиан Рональду гоолдсоноор Испанийн Эзэн хааны баг 3:2 харьцаатай ялалт байгуулсан. Тоглолтын үндсэн цаг өндөрлөхөд гуравхан минут дутуу байхад 2:1 харьцаатай тэргүүлж явсан Английн баг Европын хөлбөмбөгийн холбооны хамгийн том, нэр хүндтэй тэмцээнүүд болох Аваргуудын лиг болоод Европын лигийн нээлтийн тоглолтод талбайдаа хэзээ ч ялагдал хүлээж үзээгүй “Реал”-ын тэрхүү бахархам рекорд амжилтыг таслах тун дөхсөн. Гэвч буурал тивийн хөлбөмбөгийн топ төвшний өрсөлдөөнд хамгийн их цол гуншинтай “Реал Мадрид” гурван минутын дотор хоёр гоол оруулснаар өрсөлдөгчөө буулган авсан юм.

Арабын тэрбумтны эзэмшилд очиж, Абу Дабигийн Шейх Мансур бин Зайед бин Султан аль-Нахьяны мэдэлд шилжсэн “Манчестер Сити” клуб өнгөрсөн дөрвөн жилийн хугацаанд 1,6 тэрбум фунт стерлингийн хөрөнгө оруулалт хийсэн. Үүний дүнд дэлхийд данстай шилдэг тоглогчдыг багтаа авчирч чадсан тус багаас Эдин Жеко 68 дахь минутад гоолдсоноор тооны харьцааг нээсэн. Харин 76 дахь минутад Бразили гаралтай хамгаалагч Марсело тооны харьцааг тэнцүүлсэн бол тоглолтын 85 дахь минутад “Сити”-гийн Александр Коларовын гүйцэтгэсэн чөлөөт цохилт гоол болсноор дахин тэргүүлж эхэлжээ. Гэвч ердөө хоёрхон минутын дараа Карим Бензема тооны харьцааг тэнцүүлж, залгуулаад 90 дэх минутад Криштиан Рональду гоолдсоноор ялалт “Реал”-д ирсэн юм.

Мөн тэдний хамт “D” группт багтсан Германы “Боруссия Дортмунд” болон Голландын “Аякс” багийн тоглолт Дортмунд хотноо болж, 1:0 харьцаатай талбайн эзэд ялалт байгуулжээ.

Өнгөрсөн шөнө болсон бусад тоглолтын дүнг танилцуулъя.

“А” хэсэг:

“Динамо Загреб” 0:2 “Порту”
“ПСЖ” 4:1 “Динамо Киев”

“В” хэсэг:

“Монпелье” 1:2 “Арсенал”
“Олимпиакос” 1:2 “Шальке 04”

“С” хэсэг:

“Малага” 3:0 “Зенит Санктпетербург”
“АС Милан” 0:0 “Андерлехт”

“D” хэсэг:

“Боруссия Дортмунд” 1:0 “Аякс”
“Реал Мадрид” 3:2 “Манчестер Сити”

Харин өнөөдөр шөнө Монголын цагаар 02:45 цагт Аваргуудын лигийн E, F, G, H хэсгийн эхний тоглолтууд болно.

Тоглолтын хуваарийг танилцуулбал:

“E” хэсэг:
“Шахтёр Донецк” vs “Норшеллан”
“Челси” vs “Ювентус”

“F” хэсэг:
“Лилль” vs “БАТЭ Борисов”
“Баейрн Мюнхен” vs “Валенсия”

“G” хэсэг:
“Барселона” vs “Спартак Москва”
“Селтик” vs “Бенфика”

“H” хэсэг:
“Манчестер Юнайтед” vs “Галатасарай”
“Брага” vs “ЧФР Клуж”