УИХ-ын Төрийн байгуулалтын байнгын хорооны хуралдаан болж байна. Уг хуралдаанаар Олон нийтийн радио, телевизийн Үндэсний зөвлөлийн зарим гишүүнийг сонгох тухай асуудлыг хэлэлцлээ. Тус зөвлөл нь нийт 15 гишүүнтэйгээс наймынх нь бүрэн эрхийн хугацаа дууссан тул хуульд заасны дагуу Монгол Улсын Ерөнхийлөгчөөс Төрийн соёрхолт жүжигчин Д.Сосорбарам, Төрийн соёрхолт зохиолч Б.Цэнддоо нарыг тус бүр нэр дэвшүүлснийг байнгын хорооны хуралдаанд оролцсон гишүүд санал нэгтэй дэмжлээ. Мөн Засгийн газраас Монголын Залуучуудын холбооны ерөнхийлөгч А.Мөнхбат, “Ирээдүйгээ аврах” хөдөлгөөний тэргүүн А.Арман нарыг дээрх зөвлөлийн гишүүнд нэр дэвшүүлснийг хуралдаанд оролцсон 11 гишүүнээс 10 нь санал нэгтэй дэмжсэн юм.

Харин УИХ-аас дөрвөн хүнийг нэр дэвшүүлэх ёстой ч 29 хүний нэрийг төрийн бус байгууллагуудаас санал болгосон тул  УИХ-ын Төрийн байгуулалтын байнгын хорооны хуралдаанд оролцсон гишүүд саналын хуудас бөглөж дэмжиж байгаа хүмүүсийнхээ нэрсийг дугуйлав.  Ингэхэд Ц.Батмөнх, Д.Гоошоохүү, С.Мягмар, Л.Пүрэвдорж нар байнгын хорооны хуралдаанд оролцсон гишүүдийн 10-9-ынх нь саналыг авсан тул Олон нийтийн радио, телевизийн Үндэсний зөвлөлийн гишүүнд тус бүр нэр дэвшүүллээ. Ийнхүү Ерөнхийлөгчөөс хоёр, Засгийн газраас хоёр, УИХ-аас дөрвөн хүний нэрийг тус бүр нэр дэвшүүлснээр Олон нийтийн радио, телевизийн Үндэсний зөвлөлийн зарим гишүүдийг сонгох ажил шуударч, УИХ-ын чуулганы нэгдсэн хуралдаанаар батлагдах болж байна.

Мөн УИХ-ын Төрийн байгуулалтын байнгын хорооны хуралдаанаар орон нутгийн сонгуулийг зохион байгуулагдахад зарцуулагдах зардлын хэмжээг хэлэлцээд дэмжлээ. Сонгуулийн ерөнхий хорооноос 5.2 тэрбум төгрөг шаардлагатай гэж үзсэн байсан юм.