Акихиро Ямагүчи гэгч Японы 18 настай ахлах сургуулийн сурагч хүү усанд сэлэлтийн эрэгтэйчүүдийн 200 метрийн өврөөр даллах сэлэлтийн төрөлд дэлхийн дээд амжилтыг шинэчлэн тогтоожээ. Тэрбээр дээрх төрөл, зайд 2:07.01 минутын амжилт үзүүлсэн байна. Энэ төрөлд Унгарын тамирчин Даниэл Гюрта Лондонгийн олимпийн наадмын үеэр буюу наймдугаар сарын 1-нд 2:07.28 минутын амжилтаар дэлхийн рекордыг шинэчилсэн юм.

Японы Гифү хотноо болсон усанд сэлэлтийн улсын аварга шалгаруулах тэмцээний үеэр Ямагүчи дээрх амжилтыг үзүүлсэн байна. Тэрбээр Японы алдарт тамирчин Косүкэ Китажимагийн үнэнч бишрэгч бөгөөд цаашид дэлхийн тавцанд эх орноо төлөөлж, “залуу Китажима” болох хүсэлтэй гэнэ. Ямагүчи өмнө нь Японы ахлах сургуулийн тамирчдын рекорд эвдэж байсан, харин өнгөрөгч долдугаар сард дэлхийн залуучуудын аварга шалгаруулах тэмцээний үеэр 100 метр ба 200 метрийн уралдаанд дэлхийн дээд амжилтыг шинэчилжээ.