УДЭТ-ын
хамт олон “УДЭТ-ын өдрүүд” хэмээх аялан тоглолтоо жил бүр уламжлал
болгон зохион байгуулдаг болоод арав дахь жилийнхээ нүүрийг үзэж байна.
Энэ удаа баруун бүсийн аймгууд болох Говь-Алтай, Баян-Өлгий, Өвөрхангай,
Баянхонгор, Ховд нутгуудаар аялах драмын өдрүүд хөдөө, орон нутгийн
үзэгчдэдээ зориулж, Б.Лхагвасүрэнгийн “Тамгагүй төр”, С.Мехалковын
“Бардам туулай”, Д.Мэндсайханы “Ээж ээ”, Ч.Ганхуягийн “Эхнэрээ зээлээч”,
Ш.Гүрбазарын “Надаар тоглосон хайр” жүжгүүдээр аяны богцоо дүүргэжээ.
Энэ сарын 7-нд хөдөө орон нутгийг зорьсон УДЭТ-ын баг өнгөрсөн амралтын
өдөр Өвөрхангай, Баянхонгор  аймагт саатан уран бүтээлээ толилуулсан
билээ. Тэдний аялал цааш үргэлжлэн өнөөдөр Говь-Алтай аймагт буудалласан
юм. Тус аймагт гурав хоног үргэлжлэх драмын театрын өдрүүдийн хүрээнд
өнөөдөр хүүхэд багачуудад зориулан С.Мехалковын “Бардам туулай” хүүхдийн
жүжгийг толиулуулсан бол орой 18.00 цагт Б.Лхагвасүрэнгийн “Тамгагүй
төр”, 20.00 цагт Д.Мэндсайханы “Ээж ээ” уянгын жүжгийг толилуулах юм.

Энэ
удаагийн аялан тоглолтын бригадыг Ардын жүжигчин Г.Мягмарнаран ахалж
байгаа ба Соёлын тэргүүний ажилтан Ч.Түвшин, Э.Батхүү, Б.Отгонбат,
Б.Эрдэнэцэцэг, Ардын жүжигчин П.Цэрэндавга, Гавьяат жүжигчин Г.Равдан,
С.Сарантуяа, Соёлын тэргүүний ажилтан Б. Нармандах, Д.Ганцэцэг,
Ц.Баясгалан, Г.Амгаланбаатар зэрэг УДЭТ-ын алдартай жүжигчдээс бүрдсэн
нийт 40-өөд хүний бүрэлдэхүүнтэй орон нутгийн иргэдэд драмын урлагийг
түгээж байгаа юм.

Говь-Алтайд тоглох тоглолтын хуваарь

Есдүгээр сарын 15-нд

• 11.00 цагт С.Мехалковын “Бардам туулай”
• 13.00 цагт Ш.Гүрбазарын “Надаар тоглосон хайр”
• 18.00 цагт Д.Мэндсайханы “Ээж ээ”
• 20.00 цагт Ч.Ганхуягийн “Эхнэрээ зээлээч”

Есдүгээр сарын 16-нд

• 11.00 цагт С.Мехалковын “Бардам туулай”
• 14.00 цагт Ш.Гүрбазарын “Надаар тоглосон хайр”
• 18.00 цагт Б.Лхагвасүрэнгийн “Тамгагүй төр”
• 20.00 цагт Ч.Ганхуягийн “Эхнэрээ зээлээч” жүжгийг тус тус тоглоно.

Тэд тоглолтынхоо дараа Ховд аймгийг зорино.