“Монголын хөлбөмбөгийн холбооны цом-2012” тэмцээн есдүгээр сарын 5-нд Дулааны IV цахилгаан станцын урд байрлах “Эрчим” клубын талбай дээр эхэлсэн билээ. Энэхүү тэмцээнд лигийн зургаа, сонирхогчийн дөрвөн баг нийт 10 багийн 200 гаруй манай улсын шилдэг хөлбөмбөгчид оролцож байна. Тэмцээнийг спортыг дэмжигч “Аэромонголия” ХХК, Дулааны IV станц хамтран зохион байгуулж байгаа бөгөөд өчигдөр хэсгээсээ шалгарсан дөрвөн баг шигшээ тоглолтод шалгарах эрхийн төлөө тоглолоо.

Энэ жилийн "Нийслэл лиг"-ийн аварга "Эрчим" "Хоромхон" багийг 4:1-ээр, "Хасын хүлгүүд" "FC Ulaanbaatar" багийг 4:1-ээр буулган авснаар "Эрчим", "Хасын хүлгүүд" маргааш (09.15.12.00) цомын төлөө тоглохоор болжээ.

“Хоромхон” багт Канад, Нигери, Тринандо Табога болон Японы тоглогч, “Эрчим” багт Бразиль, Сербийн тоглогчид багтсан байна.

“Улаанбаатар FC” багт Камерун улсын Этунди Алима, Зааны ясан эрэг улсын Эрик Дагро, Либери улсын Принц Болий нар, “Хасын хүлгүүд” багт Бразилийн тоглогч багтсан байна.

Мэргэн буучдыг 9 гоолтойгоор “Хоромхон”  Ikeda Yudai, “FC Ulaanbaatar”-ын Eric Dagros нар тэргүүлж байна.

"А" хэсэгт лигийн долоон удаагийн аварга "Эрчим" багийн хувьд хэсгээсээ 100 хувийн амжилттай гарч ирсэн бол, лигийн тоглолтоос мөнгө, хүрэл медаль хүртэж байсан "Хасын хүлгүүд" баг тус хэсгийн хоёроор шалгарч, хагас шигшээд учраагаа буулган авснаар цомын төлөө "Эрчим"-тэй дахин тулахаар боллоо. 

“Монголын хөлбөмбөгийн холбооны цом-2012”-т түрүүлсэн баг үндэсний “Нийслэл лиг”-н аварга багтай “СУПЕР ЦОМ”-ын төлөө өрсөлдөх эрхийг авах юм.

“СУПЕР ЦОМ”-ын эзэн болсон баг монгол улсаа төлөөлөн Азийн Хөлбөмбөгийн Холбооны “President Cup” тэмцээнд оролцох билээ.