Хуучирсан мэдээ: 2012.09.14-нд нийтлэгдсэн

Архи тамхины онцгой албан татварыг нэмэх сургаар л аль хэзээний архи, тамхины  үнэ өсчихсөн. Нийтээрээ л архи, тамхины онцгой албан татварыг нэмэх нь зөв гэсэн бодолтой байгаа байгааг нь далимдуулаад манай зарим бизнесийнхэн хууль нь парламентаар батлаг­даагүй байхад л үнийг нь нэмчихсэн хэрэг. Уг нь бол аравдугаар сарын 1-нээс энэ хууль хэрэгжиж эхлэх юм шүү дээ. Тэр болтол архи, тамхины үнэ уг нь зах зээлийнхээ жамаар бол нэмэгдэх ёсгүй байв.

Хуульд дотоодод үйлдвэр­лэсэн болон импортын архинд ногдох онцгой албан татварыг 40 хүртэл хатуулагтай, 40 ба түүнээс дээш хатуулагтай гэж ангилж байсныг 25 хүртэл болон 25-40 хүртэл, 40 ба түүнээс дээш хатуулагтай болгож, 25-аас дээш хатуулагтай архинд ногдох онцгой албан татварыг  хоёр дахин нэмэгдүүлэхээр тусгасан байна. Онцгой албан татварын хувь хэмжээг ингэж нэмснээр архины үнэ дунджаар 3000-7500 төгрөгөөр нэмэгдэнэ гэсэн урьдчилсан тооцоо гарчээ. Монголд архины тусгай зөвшөөрөлтэй 91 аж ахуй нэгж байдаг бөгөөд онцгой албан татварын орлогын дийлэнх буюу 90 гаруй хувийг эдгээр байгууллагууд бүрдүүлдэг юм байна. Энэхүү хуулийн төсөл батлагдснаар нийгэм болон иргэдийн эрүүл мэндэд эерэгээр нөлөөлнө гэж санаачлагчид  нь үзэж байгаа. 2012 оны аравдугаар сарын 1-нээс хуу­лийг хэрэгжүүлж эхэлснээр 2012 оны төсвийн орлого 21,7 тэрбум төгрөгөөр нэмэгдэх гэнэ лээ.

 Ер нь Монголын зах зээл дэх үнийг манай ченжүүд сургаар л тогтоочихдог. Талхны үнэ нэмэгдэж магадгүй гэсэн яриа гарвал маргааш нь шууд л гурилан бүтээгдэхүүний үнийг нэмчих жишээтэй. Өнгөрсөн гуравдугаар сард Засгийн газраас жилийн зургаан хувийн хүүтэй зээл гаргалаа гэдгээ зарлангуут барилгын салбарынхан орон сууцныхаа метр квадратыг шууд 100-200 мянган төгрөгөөр нэмчихсэн шүү дээ. Сүүлийн жилүүдэд барилгын салбарт үнийн хөөсрөл үүсэх болсон гол шалтгаан нь Засгийн газраас хэрэг­жүүлэхээр зарласан  дөрвөн мянга, 40 мянга, 100 мянга гэсэн тодотголтой бага, дунд орлоготой болон төрийн албан хаагчдын орон сууц­жуу­лах хөтөлбөрөөс болсон гэдгийг эдийн засагчид дуу нэгтэйгээр баталдаг. Анх 2006 онд 40 мянган айлын орон сууц хөтөлбөрийг хэрэгжүүлэхэд орон сууцны метр квадрат нь 300-350 мянган төгрөг байсан энэхүү хөтөлбөрийн сургаар 550-650 мянган төгрөг болж нэмэгдсэн. Дараа нь 2010 онд төрийн албан хаагчдыг орон сууцжуулах төсөл хэрэгжингүүт орон сууцны үнэ 950 мянган төгрөг, өдгөө хамгийн хямд­хандаа нэг сая 500 мянган төгрөг болчихоод байна.

Өнгөрсөн өвөл нэгдүгээр сард валютын үнэ өслөө гээд шатахууны үнийг, шатахууны үнэ нэмэгдлээ гээд такси болон бусад бараа бүтээгдэхүүний үнэ бүгд нэмэгдчихсэн. Эргээд шатахууны үнэ буурлаа гээд сургаар өссөн бараа бүтээг­дэхүүний үнэ хямдраагүй юм.

Хоёр жилийн өмнө авто машины татварт өөрчлөлт оруулахтай зэрэгцэн машины үнэ өссөн. Парламентээр хэлэл­цэг­дээгүй, сураг төдийхөн байхад шүү дээ. Магадгүй хэн нэгэн бизнесийнхний явуул­гаар үнийг өсгөнөө гээд нэг нь зарладаг, нөгөө нь нэмдэг ченж маягийн зах зээл л Монголд хөгжөөд байх шиг. Үүнтэй тэмцэх, үнийг тооцоо судалгаагаар өсгөж байна уу, эсвэл сургаар нэмж байна уу гэдгийн хянах ёстой хэрэг­лэг­чийн эрх ашгийг хамгаалах ёстой төрийн болоод төрийн бус байгууллагууднь ингэхэд яг ямар ажил хийдэг юм бол. Шударга өрсөлдөөн, хэрэг­лэг­чийн төлөө газар гэж том нэртэй, төсвийн мөнгөөр цалинждаг нэг газар бий. Өнгөрсөн өвөл үгсэн хуйвалдаж, үнийг шалтгаангүйгээр нэмсэн байна хэмээн шатахуун импортлогчдыг 17 тэрбумаар торгож байгаагаа сүр дуулиан­тайхан хэвлэлийнхэнд мэдэг­дэж байснаа сарын дараа­хан гаргасан шийдвэрээ цуцалчих­сан. Нэг даргынхаа шийдвэрийг нөгөө дарга нь ирээд цуцалдаг, хэрэглэгчийн төлөө биш “баавгай”-н талд ажилладаг ийм байгууллагыг төсвөөс цалин­жуулж, төр тэжээх хэрэг байна уу. Нөөцийн мах худалдаанд гарангуут махны үнэ буурах биш харин ч 1000 төгрөгөөр нэмэгдчихдэг. Ийм л сургаар өсдөг үнэ, сургаар үнийг нэмдэг ченжүүдээс Монголын зах зээл хэзээ салах бол. Тэгсэн цагт л Монголын зах зээлд үнийн хөөсрөл үүсэхгүй, инфляцид идүүлэхгүй байх байсан биз.

Ж.ЭРХЭС

NewsMN Гар утасны хувилбар Татах
NEWS.mn

Мэдээллийн эх сурвалж