Булган аймагт Олимпийн наадамын хос медальтан МУ-ын Хөдөлмөрийн баатар, гавьяат тамирчин Н.Түвшинбаярт  хүндэтгэл үзүүлэх мялаалга наадам энэ сарын 14-нд болох гэнэ. Наадам Сайхан сумын нутаг Өрөмийн нуур хэмээх газар болох аж. Наадамд хүчит 128 бөх барилдаж, гурван насны морьд уралдаж, сурын харваа болон  шагай харваа зэрэг тэмцээнүүд зохиогдох аж. Мөн сайхан морьтон сайхан монгол дээлтэн шалгаруулж, дэмбээ наадам хийж сайхан айрагтай айл хотол айраг уух тэмцээн өрнүүлэх аж. Харин Булган аймгийн нутгийн зөвлөлөөс нутгийн хүү Олимпийн хос медальтангаа мянган цагаан хониор мялаах гэнэ. Энэ ажлыг нутгийн зөвлөлөөс иргэний төлөөлөл гарган зохион байгуулж байгаа аж. Тус аймаг 16 сумтай, сум  тус бүр  60 гаруй хонь хандивлах юм байна. Мөн тус аймгийн ИТХ, Засаг даргын тамгын газраас Н.Түвшинбаярыг 30 сая төгрөгөөр шагнаж урамшуулах  гэнэ.