Оросын рок дуучин, ая зохиогч, хөгжимчин, жүжигчин Виктор Цойг 1980-1990-ээд оныхон андахгүй. Ази төрх, өвөрмөц хоолойгоороо тухайн үеийнхнийг байлдан дагуулж байсан Цойг шүтэн бишрэгчид Монголд олон бий. Тэд хайртай дуучныхаа 50 насны ойг тэмдэглэн эргэн дурсч, хүндэтгэх нэгэн өвөрмөц тоглолт зохион байгуулахаар шийджээ. Ирэх баасан гариг буюу энэ сарын 14-нд 18.00 цагт "River sounds" клубт болох уг тоглолтыг "Х-Vit" хамтлаг, дуучин Төмөрөөгийн хамт зохиож байгаа юм. Уг дурсамж тоглолтод Виктор Цой болон түүний домогт "Кино" хамтлагийн дуунуудыг эгшиглүүлнэ.

Виктор Цой бол Орост рок хөгжмийг дэлгэрүүлсэн дуучин. Тэрбээр анхныхаа дууг 17 настайдаа зохиож байсан. Мөн анхны рок урсгалын тоглолтыг Ленинград хотноо хийсэн нь тухайн үедээ том шуугиан тарьж байсан билээ. Цой дуучин төдийгүй кино урлагт өөрийн гэсэн мөрөө үлдээж амжсан юм. Оросуудын хийсэн тулаантай киноны гол дүрүүдийг бүтээж байсан тэрбээр тун богино насалсан. 1990 оны наймдугаар сарын 15-нд 28 настайдаа автын осолд өртөж амиа алдсан юм.

Мөн өнгөрсөн наймдугаар сард түүний дурсгалд зориулан ОХУ-ын алдарт “Кино” хамтлагийхан Виктор Цойгоос бусад нь бүрэн бүрэлдэхүүнээрээ цугласан юм. Учир нь тэд 22 жилийн өмнө Цойгийн дуулсан хамгийн сүүлийн бичлэгийг амьдруулан “Атаман 2012” клипээ хүргэсэн. Тэрхүү бичлэг нь кассетэн дээр байсан бөгөөд хамтлагийн бүрэлдэхүүн нь Цойгын дуу хоолойг стеро хоолойгоор нь клипжүүлэн дахин дэлгэцнээ амьдруулан нь  түүний шүтэн бишрэгчдэд үнэхээр гайхалтай гэнтийн бэлэг болсон юм. “Цой жив он просто вышел покурить…” тийм ээ, Цой амьд тэр тамхилахаар л явсан.