“ТВ Коктейль” хамтлагийнхан өнгөрсөн амралтын өдөр УДБЭТ-ын тайзнаа “Хоёр ертөнцийн буудал” анхны драмын жүжгийнхээ нээлтийг хийж, урлаг, соёлын алдартнуудын хөлд дарагдсан билээ. Тэдний жүжгийн нээлтэд урлаг, соёлын оддоос гадна спортын аваргууд хүрэлцэн ирсэн юм. Улсын заан Ч.Санжаадамбыг УДБЭТ-т жүжиг үзэхээр ирэхэд гэрэл зурагчид бүчин авсан бөгөөд тэрбээр “гэрэл анивчуулан ингэж зургаа татуулах чинь ямар эвгүй юм бэ” хэмээн хошигнож байсан бол харин жүжгийн дундуур нулимс мэлтэлзүүлэн огшиж суугаа харагдсан шүү. Түүнээс гадна Улсын гарьд Ш.Бат-Эрдэнэ, Гавьяат тамирчин Б.Наранбаатар, Хөдөлмөрийн Баатар, Гавьяат тамирчин Х.Цагаанбаатар гэргий Гавьяат тамирчин О.Гүндэгмаагийн хамт, олимпийн аварга, Хөдөлмөрийн баатар, боксчин Э.Бадар-Ууган гэргийн хамт, Хөдөлмөрийн баатар, Гавьяат тамирчин П. Сэрдамба, өнгөрсөн наймдугаар сард болсон Лондонгийн зуны XXX олимпийн рингэнд ээлж дараалан хүнд тулаан хийж, өрсөлдөгчдөө буулган авснаар мөнгөн медалийн эзэн болсон Гавьяат тамирчин Н.Төгсцогт гээд Монголын спортыг тив дэлхийд дуурсгаж яваа эрхмүүд үзэгчдийн суудалд тухалсан юм. Эдгээр алдартнууд маань алдрын оргил дээр дуслуулан байдаг үнэтэй нулимсаа энэ л алтан тайзнаа толилуулсан жүжгийг үзэж суугаад унагахыг нь харахад “ТВ Коктэйль” хамтлагийнхан алтны дайтай уран бүтээл туурвижээ хэмээн бахархах сэтгэл төрж байсныг нуух юун.

“ТВ Коктейль” хамтлагийнхан  “Хоёр ертөнцийн буудал” драмын сонгодог жүжиг энэ сарын 18-ныг дуустал өдөр бүр УДБЭТ-ын тайзнаа 19.00 цагтаас үзэгчдийн хүртээл болно. Та амжаад үзээрэй.