УИХ-ын чуулганы нэгдсэн хуралдаанаар Засгийн газрын 2012-2016 оны үйл ажиллагааны мөрийн хөтөлбөрийн төслийг хэлэлцлээ. Эл төсөлтэй холбогдуулан гол төлөв МАН-ын гишүүд асуулт асууж, холбогдох сайд нараас хариултаа авлаа. Тухайлбал, УИХ-ын гишүүн Н.Номтойбаяр Сум хөгжүүлэх сангийн хөрөнгийг татаж Хөдөлмөр эрхлэлтийг хөгжүүлэх санд төвлөрүүлэх зүй ёсны шаардлага байгааг санууллаа. Учир нь Сум хөгжүүлэх сангаар дамждаг зээлийг Засаг дарга нар өөрийн талын танил талдаа олгодог. Эргэн төлөлт маш муу. Харин Хөдөлмөр эрхлэлтийг дэмжих сангаас олгодог зээлийн эргэн төлөлт сайн байгаа аж. Нөгөө талаас гадаадаас ажиллах хүчин авах асуудалд онцгой анхаарахгүй бол зөвхөн нэг улсын харьяат иргэд олноороо ажиллах болж байгаа. Эл асуудалд Хөдөлмөрийн яам анхаарах. Нөгөө талаас мэргэжилтэй ажилтан бэлтгэхэд онцгой анхаарч эл асуудлыг Хөдөлмөрийн яамны харьяанд шилжүүлэхгүй бол Монгол Улс гадаадаас ажиллах хүчин авах эрэлт буурахгүй байх талтайг сануулсан юм. Үүнд Хөдөлмөрийн сайд Я.Санжмятав “Мэргэжлийн сургалт үйлдвэрлэлтийн төвийг Хөдөлмөрийн яамд харьяалуулж, хувийн хэвшилтэй хамтарч ажиллахаар шийдсэн. Нөгөө талаас Мэргэжлийн сургалт үйлдвэрлэлийн төвд суралцагчдыг нэмэгдүүлэхэд онцгой анхаарна. Гадаад авах ажиллах хүч нэлээд нэмэгдсэн байсан. Тэр дундаа нэг орноос ирж ажиллах ажиллах хүчин нэг хувиас давсан байсныг бууруулахаар ажиллаж байна. Цаашдаа бид гаднаас ажиллах хүчнээр ирж байгаа ажилтнуудын 10-15 хувийг багшлах байдлаар ажиллуулж хүнээ сургаад дараа дараагийн жилүүдэд ажиллах хүчин авах орон тоог цөөрүүлэх бодлого барина.  Мөн тодорхой хугацаатай орж ирж ажиллаад түүнийгээ дахин сунгах бол төлбөрийг нь хоёр дахин нэмнэ. Одоогийн гадаадаас ажиллах хүчин орж ирэхэд 280800 төгрөг авдаг,  ийм зохицуулалт хийснээр гадаадын ажиллах хүчин хугацаандаа буцах боломжтой болно.

Хууль зүйн сайдтай мөн ярилцсан, тоо харахад хятад жуулчдын тоо эрс нэмэгдэж байна. Нэг ёсны жуулчны визээр орж ирээд сарын турш ажил хийдэг. Тиймээс жуулчны визийн хугацааг хязгаартай болгох. Дээд тал нь 10 хоног байхаар хязгаарлалт хийх. Ингэвэл энэ талын зөрчил буурна. Сум хөгжүүлэх сангийн хөрөнгийг Хөдөлмөр эрхлэлтийг дэмжих санд төвлөрүүлье гэдэгтэй санал нийлэхгүй байна.  Сум хөгжүүлэх сан үр дүнгээ өгч байгаа. Гол нь сангийн хөрөнгөөс хэн хэн зээл авч байна вэ гэдэгт хяналт тавихын тулд иргэдийн хяналтыг сайжруулах. Ингэснээр  сум орон нутагт ажлын байр нэмэгдэх бололцоо бүрдэнэ. Том зээлийн ихэнх нь том компанид, төв суурин газар хэрэгжээд хөдөө газарт тэр нь олддоггүй хаягддаг. Тийм учраас үүнийг нөхөх орон зай нь Сум хөгжүүлэх сан. Зовлонг нь мэдэх хүний хувьд тус сангийн хөрөнгийг үр өгөөжтэй зарцуулах чиглэл рүү нь анхаараад ажиллах бололцоотой” гэсэн хариулт өгсөн юм.

Мөн хэлэлцсэн асуудалтай холбоотойгоор цэцэрлэг, сургуулийн хүрэлцээ, чанарын асуудал ч хөндөгдлөө. Боловсрол, шинжлэх ухааны сайд Л.Гантөмөр эл асуудалтай холбогдуулан “Хүүхдүүдийн 50 хувь нь цэцэрлэгт явах боломжгүй, зарим сургууль гурван ээлжээр хичээллэж байна. Бидний хувьд хүүхэд болгон цэцэрлэгт орж чаддаг болох орчинг бүрдүүлэх явдал. Хүүхэд бүр сургууль дээрээ 7-8 цаг байдаг болгоё. Тэрчлэн эцэг, эхчүүд авлигал өгөхгүй, арын хаалга хэрэглэхгүйгээр хүүхдээ цэцэрлэгт сонгоод оруулдаг тэр тогтолцоог бүрдүүлэх ёстой.  Их, дээд сургуулийн сургалтын чанарыг дээшлүүлэх чиглэлээр ажиллана, тэр тусмаа төгсөөд ажлын байранд очиход хэнд ч гологддоггүй байх, дэлхийн боловсрол эзэмшсэн байх тийм л зорилт тавьсан. Үүний төлөө л явна” гэлээ. 

Ийнхүү Засгийн газрын мөрийн хөтөлбөртэй холбоотойгоор гишүүд сонирхсон асуултдаа хариулт авч дууссанаар үргэлжлүүлэн саналаа хэлэх байсан ч чуулганы хуралдааныг түр завсарлууллаа. Үдээс хойшхи чуулганы нэгдсэн хуралдаан 16.00 цагаас үргэлжилнэ.