“Тиранозавр батаар”-ын хэрэг дээр ажиллаж буй өмгөөлөгч нар олдворыг Монголын хилээр хууль бусаар гаргасныг нотолж чадаагүй учраас аварга үлэг гүрвэлийн араг ясыг хааш нь ч хөдөлгөхгүй гэж АНУ-ын Холбооны шүүгч мэдэгдсэн гэнэ. Монголын талын өмгөөлөгч нарын үзэж буйгаар 70 сая жилийн тэртээ амьдарч байсан “Тиранозавр батаар” гэх уг тарбозаврын араг ясыг 1946 онд Зөвлөлт-Монголын хамтарсан экспедиц Монголын говиос олсон бөгөөд хоёр жилийн өмнө Техаст аваачих хүртэл ямар зам туулсныг тогтоох гэж оролдож байгаа билээ. Олдворыг өнгөрсөн тавдугаар сард Нью-Йорк хотод дуудлага худалдаагаар 1.05 сая ам.доллараар худалдахын өмнө Монгол Улсын Ерөнхийлөгч Ц.Элбэгдорж шүүхэд нэхэмжлэл гаргасан юм. Техас мужийн шүүх олдворын хууль ёсны эзнийг тогтоох хүртэл худалдан авагчийн гарт шилжүүлэхийг хориглосноос хойш хэдэн долоо хоногийн дараа өмгөөлөгчид Нью-Йоркийн өмнөд дүүргийн шүүхээс “Тиранозавр батаар”-ыг Монголын тал шилжүүлэхийг хүссэн.

Гэвч өнгөрсөн долоо хоногт олдворыг Их Британиас АНУ-д аваачиж, дуудлага худалдаанд оруулсан эртний олдворын наймаачин Эрик Прокопийн өмгөөлөгч олдвор нэг биш, нэлээд хэдэн үлэг гүрвэлийн араг ясыг цуглуулж, төмөр утсанд бэхэлж тогтоосон үзмэр гэж мэдэгдсэн нь хэргийг улам ээдрээтэй болгосон юм.

“Тиранозавр батаар”-ын хэрэг дээр ажиллаж буй Монголын талын өмгөөлөгчид олдворыг Монгол Улсын хилээр хулгайгаар гаргасан гэдгийг нотлохын тулд Эрик Прокопи үлэг гүрвэлийн араг ясыг 15.000 ам.долларын үнэтэй хэмээн гаалийн хуурамч бичиг баримт бүрдүүлсэн гэж заргалдаж байгаа билээ.

Харин Эрик Прокопи АНУ-ын хилээр тус бүр нь 15.000 ам.долларын үнэтэй дөрвөн үлэг гүрвэлийн голдуу органик бус засч, янзалсан араг ясыг оруулж ирсэн гэж ярьж байгаа гэнэ.

Холбооны шүүгчийн хэлж буйгаар “Тиранозавр батаар”-ын араг ясыг хулгайгаар хил давуулсан байлаа ч Монголын талд үүнийг нотлох хангалттай баримт байхгүй гэнэ. “Тиранозавр батаар”-ын хэргийн дараагийн шатны шүүх хурал энэ сарын 21-нд болох бөгөөд тэндээс ирэх аравдугаар сарын эхээр олдворыг Монголын талд шилжүүлэн өгөх эсэх нь тодорхой болох гэнэ.