3,415.19
Сонгодог хөгжимд дуртай хэн бүхний хүсэн хүлээдэг”Мемори поп оркестр”-ын тоглолт энэ есдүгээр сарын 16-нд Үндэсний соёл амралтын хүрээлэнгийн “Завь” кафед, задгай тайзан дээр болох гэж байна. Цахилгаан хөгжмийг симфони оркестртой хослон тоглох “Мемори поп оркестр”-ын сонгодог үдэшт үзэгчдийн сэтгэлд хоногшсон, дурсамж үлдээсэн танил аялгуу эгшиглэж, Монголын шилдэг дуурийн дуучид Италийн хөгжмийн зохиолчдын ари, романсаас дуулж, таны сэтгэлийг сэргээж өгөх нь лавтай.
Улсын дуурь, бүжгийн эрдмийн театрын дэргэдэх мэргэжлийн хөгжимчдөөс бүрдсэн Мемори поп оркестрыг 2004 онд Монгол Улсын гавьяат жүжигчин, УДБЭТ-ын хийлч Л.Мөнхцэцэгийн санаачлагаар 16 хүний бүрэлдэхүүнтэйгээр байгуулагдаж байсан юм. Урийн сангаа дэлхийн болон Монголын сонгодог уран бүтээлээр баяжуулсаар ирсэн “Мемори поп оркестр”-ын уран бүтээлчид жил бүр тоглолт хийдэг уламжлалтай. Өдгөө “Мемори поп оркестр” нь 34 хүний бүрэлдэхүүнтэй болж мэргэжлийн чадварлаг хөгжимчдөөр бүл нэмж, үзэгчдийн хэдийнэ сонсох дуртай, хүсэн хүлээдэг томоохон тоглолтынх нь нэг болж чадсан юм. “Мемори поп оркестр”-ыг хэвлэлээр ШИНЭ ЗУУНЫ УРСГАЛ хэмээн тодорхойлдог.
Өдгөө найм дахь жилдээ тоглолтоо хийх гэж буй “Мемори поп оркестр”-н уран бүтээлчид энэ удаад Паркийн “Завь” кафед, задгай орчинд тоглолтоо хийхээр бэлтгэл ажилдаа оржээ. Тоглолтын тасалбар 45,000 төгрөг бөгөөд таныг Италийн хөгжмийн зохиолчдын аялгуунд уяраах гэнэ.
М.ДӨЛ
