Талбайн теннисний оны дөрөвдэх “Их дуулга” болох “Америкийн нээлттэй тэмцээн” наймдугаар сарын 27-нд эхэлсэн билээ. Тэмцээний 14 дэх өдөр эмэгтэйчүүдийн ганцаарчилсан төрлийн шигшээ тоглолт болж АНУ-ын нэрт теннисчин Серена Уильямс түрүүлснээр “Их дуулга”-ын 15 дахь түрүүгээ хүртлээ. Серена эхний сэтийг 6:2-оор илүүрхэж өөрийн болгосон бол удаах сэтэд Азаренка 6:2-оор илүүрхсэн байна. Ингээд тоглолтын шийдвэрлэх гурав дахь сэтэд Серена илүү байж 7:5-аар тэргүүлснээр, тэмцээний аваргаар тодорлоо. Тус тэмцээнд дөрөвт чансаалагдсан Серена энэ жилийн “Уимлбьдон”, Лондонгийн олимпийн наадамд түрүүлээд (хосын төрлийн алт) байсан юм. Өнгөрсөн жилийн “Америкийн нээлттэй тэмцээн”-ий шигшээд шалгарахдаа Австралийн Стосурт ялагдсан ч боловч энэ жилийн тэмцээнд түрүүлснээр “US OPEN”-д дөрөв удаа, нийт “Их дуулга”-ын 15 дахь түрүүгээ хүртээд байна. Серена тус тэмцээнд түрүүлснээр нэг сая 900 мянган ам.долларын шагнал хүртэж, чансааны 2000 оноо авчээ. Видеог ЭНД дарж үзнэ үү.

Дэлхийн манлай теннисчин Беларусын Виктория Азаренкагийн хувьд энэ жилийн “Австралийн нээлттэй тэмцээн”-нд түрүүлж, Лондонгоос хүрэл медаль (холимог хосын алттай) хүртээд байсан түүний хувьд оны сүүлийн “Их дуулга” болох Америкийн нээлттэй тэмцээний шигшээд шалгарснаар 950 мянган ам.доллар хүртэж, чансааны 1600 оноо хүртжээ.

Энэ жилийн “Америкийн нээлттэй тэмцээн”-ий үеэр АНУ-ын Энди Роддик, Белгийн Ким Клийстерс нар зодог тайллаа. Энди Роддикийн хувьд 2003 онд “Америкийн нээлттэй тэмцээн”-д
түрүүлж, "Уимбльдон"-ы шигшээд гурван удаа (2003, 2004, 2009) шалгарч,
ATP-ийн чансааг 2003 онд тэргүүлж байсан. 29 настай Ким
Клийстерс “Их дуулга”-ын дөрвөн түрүүг хүртэхдээ, “Америкийн нээлттэй
тэмцээн”-д гурван удаа удаа (2005, 2009, 2010), “Австралийн нээлттэй
тэмцээн”-нд (2011) түрүүлж, улмаар оны төгсгөлд шилдэг найман теннисчин
оролцдог "WTA Championships"-д гурван удаа (2002, 2003, 2010) түрүүлж
байсан байна. Мөн хосын төрлөөр 2003 онд "Францын нээлттэй тэмцээн" болон
"Уимбльдон"-д түрүүлж байжээ.