Тэгш тоотой жилд Олон улсын шатрын холбооноос зохион байгуулдаг дэлхийн шатрын 40-р олимпиад Туркийн Истанбул хотноо наймдугаар сарын 27-нд эхэлсэн билээ. 11 дэх өргийн тоглолт есдүгээр сарын 9-нд болж медальтнууд тодрох тус тэмцээний аравдугаар өргийн тоглолт өчигдөр боллоо.

Аравдугаар өрөгт эрэгтэй баг Иракийг 4:0-оор буулган авлаа. Энэ өрөгт олон улсын мастер Б.Гүндаваа, их мастер Д.Шаравдорж, их мастер Ц.Батчулуун, олон улсын шатрын холбооны мастер Г.Мөнхгал нар өрсөлдөгчөө буулган авч олон улсын шатрын холбооны мастер М.Гүнбаяр өнжсөн байна. 150 орноос 56-д эрэмбэлэгдсэн эрэгтэй шатарчид арван өргийн дараах байдлаар Фижигийн арал, Австрали, Афганистан, Зимбабве, Ирак улсын багийг хожиж, АНЭУ-ын багтай тэнцэн, Канад, Молдав, Итали, Шведийн багт хожигдсон амжилтаар 57-р байрт явна. Эрэгтэйчүүдийг Хятад, Армени, ОХУ, Украйны багууд найман хожилтой тэргүүлж байна.

Аравдугаар өрөгт эмэгтэй баг АНУ-ын багтай тоглож 2:2-оор тэнцсэн байна. Энэ өрөгт их мастер Б.Мөнгөнтуул өрсөлдөгчөө хожиж, их мастер Т.Батчимэг, олон улсын мастер Д.Янжиндулам нар тэнцэж, олон улсын мастер Б.Анхчимэг ялагдал хүлээжээ. Олон улсын шатрын холбооны мастер С.Отгонжаргал өнжсөн байна.

120 орноос 21-д эрэмбэлэгдсэн манай эмэгтэй шатарчид арван өргийн дараах байдлаар Туркийн 2-р баг, Англи, Швед, Боливи, Дани, Эквадорын багийг хожиж, АНУ-тай тэнцэн, ОХУ, Азербайжан, Казакстаны багт хожигдсон амжилтаар 21-р байрт явна. Аравдугаар өрөгт манай эмэгтэйчүүдтэй тэнцсэн АНУ-ын бүсгүйчүүд тавд эрэмбэлэгдсэн бөгөөд тэдний хувьд таван хожил, гурван тэнцээ, хоёр хожигдолтойгоор 17-р байрт явна. Эмэгтэйчүүдийг Хятад, ОХУ-ын улсын бүсгүйчүүд долоон хожилтой тэргүүлж байгаа бол Украйн, Францын багууд удаалж байна.

Тэмцээний сүүлийн өрөг болох 11-р өрөгт эрэгтэй баг Катарын багтай, эмэгтэй баг Италын багтай оноолт таарчээ. 63-т эрэмбэлэгдсэн Катарын багийн хувьд таван хожил, нэг тэнцээ, дөрвөн хожигдолтойгоор 66-р байрт, Италийн баг зургаан хожил, нэг тэнцээ, гурван хожигдолтойгоор 23-р байрт явна.

Тэмцээний хуваарь ёсоор өнөөдөр тамирчид амарч маргааш сүүлийн өргөө тоглож, медальтнууд тодорно. (Монголын цагаар ням гаригийн 20.00 цагаас эхэлнэ.)

Есдүгээр сарын 7 (Аравдугаар өрөг)

Эмэгтэй баг: Монгол-АНУ (2,0:2,0)


Эрэгтэй баг: Ирак-Монгол (0:4)

Арван өргийн дараах байрдлаар шатарчдын хувийн оноог танилцуулья.

Эрэгтэй шатарчид:

Их мастер Ц.Батчулуун (2493) – 6 оноо (4 хожил, 4 тэнцээ)
Олон улсын мастер Б.Гүндаваа (2519) – 5 оноо (4 хожил, 2 тэнцээ)
Их мастер Д.Шаравдорж (2446) – 5 оноо (5 хожил)
Олон улсын шатрын холбооны мастер Г.Мөнхгал (2394) – 4 оноо (3 хожил, 2  тэнцээ)
Олон улсын шатрын холбооны мастер М.Гүнбаяр (2358) – 3 оноо (2 хожил, 2 тэнцээ)

Эмэгтэй шатарчид:

Их мастер Б.Мөнгөнтуул (2434) – 6 оноо (5 хожил, 2 тэнцээ)
Их мастер Т.Батчимэг (2311) – 5,5 оноо (4 хожил, 3 тэнцээ)
Олон улсын мастер Д.Янжиндулам (2232) – 5.5 оноо (5 хожил, нэг тэнцээ)
Олон улсын шатрын холбооны мастер С.Отгонжаргал (2146) – 4.5 оноо (4 хожил, нэг тэнцээ)
Олон улсын мастер Б.Анхчимэг (2167) – 3.5 оноо (3 хожил, нэг тэнцээ)