Нийслэлийн МАН-ын хорооны дарга Ц.Сандуй дөрвөн дэд даргынхаа хамтаар өнөөдөр сэтгүүлчдэд мэдээлэл хийлээ. Орон нутгийн сонгуулийг ирэх арваннэгдүгээр сарын эхний долоо хоногт зохион байгуулахаар УИХ-аар хуулийн төслийг хэлэлцэж байгаа. Цаг хугацаа арай тулчихаагүй мэт боловч улс төрийн намууд эл сонгуульд дор бүрнээ бэлтгэж буй бололтой, МАН-ынхан хэрхэн оролцох тухайгаа ийн мэдэгдлээ. Нийслэлийн МАН-ын хорооны дарга Ц.Сандуй “Удахгүй болох орон нутгийн хурлын ээлжит сонгуульд МАН эв нэгдлээ бэхжүүлж, хийсэн ажилтай, хэлэх үгтэй, дүүрэг, хороодод нэр хүндтэй, нэр цэвэр, шударга, иргэдийнхээ итгэлийг дааж ажиллах чадвартай хүмүүсийг нэр дэвшүүлнэ” гэлээ. Түүнээс сэтгүүлчид дараах асуултад хариулт авсан юм.

-Намын шинэчлэлийн бодлогыг тууштай хэрэгжүүлнэ гэлээ. Яг юунаас эхлүүлэхээ хэлээд байна вэ?

-Миний хувьд нийслэлийн МАН-ын хорооны дарга болоод 20 гаруй хоног өнгөрлөө. Өнгөрсөн хугацаанд намынхаа олон гишүүнтэй уулзсан. Ер нь ингэж уулзаж байх ч ёстой юм. Намын гишүүдийн зүгээс “Дарга нар хэт вакумжсан орчинд ажиллаж байна. Зөвхөн аппаратынхаа хүмүүстэй ажиллахаас нэг их хэтэрдэггүй. Үүнээс болж намын нэр хүнд уналаа” гэж байр сууриа илэрхийлсэн, би “Зөв” гэж боддог. Мөн намын дотоод эв нэгдлийг бэхжүүлэх нь чухал байгаа. Бид ирэх долоо хоногт намын бүх үүрийн гишүүдтэйгээ уулзана. Нийслэлийн МАН-ын хорооны шинэ даргын хувьд би бүх гишүүндээ хандаж захидал илгээлээ. Энэхүү захидлын хариуд гишүүд, дэмжигчид маань санал бодлоо дэвшүүлэх байх. Үүнээс гадна бид холыг харсан дорвитой төсөл, хөтөлбөр хэрэгжүүлнэ.

-Нууц биш бол ирэх сонгуульд ямар тактикаар ажиллах вэ?

-Бид сөрөг хүчин боллоо гээд бүхнийг үгүйсгэж, шүүмжлэх нь утгагүй. Нийслэлчүүдийн төлөө хийж буй сайн үйлс бүхнийг дэмжих учиртай. Үнэхээр болохгүй, бүтэхгүй зүйл байвал бид сөрөг хүчний байр сууринаас хандах нь зүйн хэрэг. Миний хувьд залуу, эрч хүчтэй хүмүүсээр багаа бүрдүүлж, их хурдтай, зөв бодлоготой ажиллахыг эрмэлзэж байгаа. Тэр дундаа намын үүрүүдийн боловсон хүчний чадавхийг дээшлүүлэхэд анхаарна.