Тэгш тоотой жилд Олон улсын шатрын холбооноос зохион байгуулдаг дэлхийн шатрын 40-р олимпиад
Туркийн Истанбул хотноо наймдугаар сарын 27-нд эхэлсэн билээ. 11 дэх
өргийн тоглолт есдүгээр сарын 9-нд болж медальтнууд тодрох тус тэмцээний есдүгээр өргийн тоглолт өчигдөр боллоо.

Есдүгээр өрөгт эмэгтэй баг Эквадорын багийг 3.5:0.5-аар хожиж ялалт байгууллаа. Энэ өрөгт их мастер Б.Мөнгөнтуул, их мастер Т.Батчимэг, олон улсын мастер Д.Янжиндулам нар өрсөлдөгчөө хожиж, олон улсын шатрын
холбооны мастер С.Отгонжаргал тэнцсэн байна. Харин олон улсын
мастер Б.Анхчимэг энэ өрөгт өнжжээ.

120 орноос 21-т эрэмбэлэгдсэн эмэгтэй шатарчдын хувьд есөн өргийн дараах байдлаар Туркийн 2-р баг, Англи, Швед, Боливи, Дани, Эквадорын багийг хожиж, ОХУ, Азербайжан, Казакстаны багт хожигдсон амжилтаар 19-р байрт явна. Хятадын бүсгүйчүүд долоон хожилтой, ОХУ, Украйн, Казакстаны багууд зургаан хожилтойгоор удаалж байна.

Есдүгээр өрөгт эрэгтэй шатарчид Шведийн багт 1:3-аар ялагдал хүлээжээ. 150 орноос 56-д эрэмбэлэгдсэн эрэгтэй шатарчид есөн өргийн дараах байдлаар Фижигийн арал, Австрали, Афганистан, Зимбабве улсын багийг хожиж,
АНЭУ-ын багтай тэнцэн, Канад, Молдав, Итали, Шведийн багт хожигдсон амжилтаар 71-р байрт явна. Энэ өрөгт АНУ-ын баг ОХУ-ын багийг (2.5:1.5), Армени Германыг (2.5:1.5), Хятад Филипинийг (3.5:0.5) хожсоноор тэргүүлэгчдийг байрт өөрчлөлт орж Хятад, ОХУ, Армени, АНУ-ын шатарчид тэмцээнийг тэргүүлж байна.

Аравдугаар өрөгт эрэгтэй баг Ирактай, эмэгтэй баг АНУ-ын бүсгүйчүүдтэй оноолт таарчээ. Тавд эрэмбэлэгдсэн АНУ-ын бүсгүйчүүд өчигдрийн тоглолтод Украйны багт 1:3-аар хожигдсоноор таван хожил, хоёр тэнцээ, хоёр хожигдолтойгоор 14-р байрт явна. Эрчүүдтэй оноолт таараад байгаа 79-д эрэмбэтэй Иракийн баг дөрвөн хожил, нэг тэнцээ, дөрвөн хожигдолтойгоор 92-р байрт явна.

Тэмцээний хуваарь ёсоор 10-р өргийн тоглолт өнөө шөнө болж (монголын
цагаар 20.00), тамирчид маргааш амран сүүлийн 11-р өргийн тоглолтоо ирэх ням
гаригт хийж тэмцээний аваргууд тодорно.

Есдүгээр сарын 6 (Есдүгээр өрөг)

Эмэгтэй баг: Монгол-Эквадор (3.5:0.5)

Эрэгтэй баг: Монгол-Швед (1:3)

Тэмцээний талаархи дэлгэрэнгүй мэдээллийг ЭНД дарж үзнэ үү.