УИХ дахь МАН-ын гишүүд өнөөдөр ээлжит бус хуралдаан хийлээ. Эл хуралдаанаас бүлгийн хоёр ч дэд даргыг сонгожээ. Тодруулбал, МАН-ын бүлгийн дэд даргаар УИХ-ын гишүүн Д.Оюунхорол, С.Бямбацогт нарыг тус бүр сонгосон аж. Сануулахад, УИХ дахь МАН-ын гишүүд бүлэг албан ёсоор байгуулагдсан, бүлгийн даргаараа бид Н.Энхболд гишүүнийг 100 хувь дэмжин баталсан гэдэг байр суурь баримталж байгаагийн зэрэгцээ сонгогчдын 40 гаруй хувийн саналыг авсан хүчтэй цөөнх шүү хэмээн мэдэгдсээр байгаа.

Харин олонхийн бүлгийн хувьд “УИХ-ын дарга томилогдсоноос 24 цагийн дотор намын бүлэг байгуулах албан ёсны хүсэлтээ УИХ-ын даргад өгөх ёстой. Ийм үүргээ МАН-ын гишүүд биелүүлээгүй тул бүлэг байгуулах хуулийн төслийг УИХ-аар хэлэлцэж байж асуудал шийдэгдэнэ” гэсэн байр суурийг сөргүүлэн тавьж буй юм.