“Карибын тэнгисийн дээрэмчин” киноны од  Кира Найтли Оросын алдарт зохиолч Лев Толстойн Анна Каренина романаас сэдэвлэсэн “Анна Каренина”  кинонд тоглох гэж байгаа талаараа өмнө нь мэдэгдэж байсан билээ.

Харин өчигдөр буюу мягмар гаригт Лондон хотноо уг киноны улаан хивсний ёслол болсон байна. Энэ үеэр кинонд тоглосон нэрт жүжигчид хүрэлцэн ирж шүтэн бишрэгчидтэйгээ уулзах боломж олджээ. Английн нэрт найруулагч Жо Райтийн найруулсан уг кинонд Кира Найтли киноны гол дүр болох Аннагийн дүрийг  бүтээсэн гэнэ.

Түүнтэй уг кинонд хамтран тоглосон гол дүрийн эрэгтэй жүжигчин нь Английн нэрт жүжигчин, “Хүйтэн уул” киногоороо олны танил Жүүд Лоу аж. Энэхүү кинонд Анна Каренинагийн нөхрийн дүрийг Жүүд Лоу бүтээсэн бол Аннагийн хайр сэтгэлийн эзэн Вронскигийн дүрд  нэрт жүжигчин Аарон Жонсон тоглосон байна. Энэхүү кинондоо найруулагч Райт 19-р зууны Оросын театрчилсан уран бүтээлийг дэлгэцэнд буулгаснаараа онцлог аж.

Оросын агуу зохиолчийн уран бүтээлээс сэдэвлэсэн уг киног үзэгчид тэсэн ядан хүлээж байгаа бөгөөд энэхүү кино энэ сарын 7-ноос кино театруудаар гарч эхлэх гэнэ.