Баянзүрх дүүргийн 21 дүгээр сургуулийн хойно баригдсан Усан спортын сургалтын төв өнөөдөр нээлтээ хийж үйл ажиллагаагаа эхэллээ. Тус дүүрэг энэ оныг Хөрөнгө оруулалт иргэдийн оролцоог нэмэгдүүлэх жил болгон зарлаж иргэдийнхээ санал санаачилгад тулгуурласан олон ажлыг хийж хэрэгжүүлж байгаа аж. Дээвэр дээрээ сагсан бөмбөгийн талбайтай, усан спортын төв нь доод давхартаа фитнес, чийрэгжүүлэлт, аэробекийн өрөөнүүд байрлаж байна.

Манай улсад анх удаагаа барилгын дээврийг сагсан бөмбөгийн талбай болгон ашиглахаар барьж байгаа гэдгийг тус дүүргийн Засаг дарга Б.Батзориг нээлтийн үеэр хэллээ. Эрүүл ахуйн хяналт өндөр шаарддаг бассейны усыг хүчилтөрөгчөөр байнга ариутгаж байх технологи хэрэглэх юм байна. Мөн бассейныг ариутгах цэвэрлэгч роботууд усан сангийн ханыг нэг бүрчлэн арчиж цэвэрлэх аж. Тус усан спорт сургалтын төв нь жилийн дөрвөн улирлын турш ажиллах юм байна.