Европын холбооны гишүүдийг дэмжих санг байгуулахаас канцлер Ангела Меркелийг татгалзвал өөрийн орноо  евро бүсээс гаргана гэж Францын ерөнхийлөгч Николя Саркози Меркелийг тавдугаар сард сүрдүүлсэн ажээ. El Pais агентлаг Франц, Итали ба Испани гурав ЕХ-ны гишүүдэд зориулагдсан сан байгуулахаар Германд шахалт үзүүлсэн тухай бичжээ. Энэ тухай Испанийн El Pais сонин Испанийн Ерөнхий сайд Хосе Луис Родригес Сапатерогийн хэлснээс иш татан бичжээ. Саркози Меркелийг айлгасан тухай Испанийн ерөнхий сайд энэ сарын 12-ны өдөр Социалист намынхантайгаа уулзах үеэр хэлсэн байна.
Сапатерогийн яриагаар бол Саркози ЕХ-ны бүх гишүүдээс сан байгуулах төслийг үг дуугүй дэмжихийг шаардаж байсан гэнэ. Францын  ерөнхийлөгч ширээ шаан 750 тэрбум еврогийн  сан байгуулахыг дэмжихийг шаардан эс бөгөөс “евро бүсээс гарна” гэж айлгаж байсан гэнэ. Харин Саркозийн хэвлэлийн төлөөлөгч Сапатерогийн хэлсэнд тайлбар өгөхөөс татгалзсан байна.
Сүрдүүлэг амжилт олж Меркель сан байгуулах төлөвлөгөөг дэмжив.
Санг энэ сарын 9-нд байгуулсан ба тэр нь евро бүсийн орнуудын санхүүг тогтворжүүлэхэд нь туслах зорилготой юм.  “Сүйрлийн ирмэгт ирээд байхад Европ нэгдэн нягтарч хариу өгч чадахгүй бол евро байх шаардлагагүй” гэж Саркози хэлсэн ажээ.  
Одоо евро бүсэд 16 орон ордог юм. Валютын холбоонд хамгийн сүүлд Словак нэгдсэн ба удалгүй Эстони түүнд орох гэнэ.