Хөгжлийн бэрхшээлтэй иргэдийг дэмжих, урам зориг өгөх зорилгын дор санал нэгдсэн “А5” төслийнхөн “Самрын үр” уран сайхны киног “Шинэ Монгол” дунд сургуульд маргааш 18.00-21.00 цагийн хооронд үзүүлэхээр болжээ. Энэ кино нь хөгжлийн бэрхшээлтэй иргэдийн ертөнцийг дэлгэн харуулж, энэ талаарх ойлголтыг зөв хүргэх, хүсэл мөрөөдөл дүүрэн энэ хорвоогийн нэгэн иргэн болохыг харуулах юм байна.

Уран бүтээл хэрхэн бүтэж байсан түүхээс дурдвал, сонсголын бэрхшээлтэй нэгэн охины бодит амьдралаас сэдэвлэн, түүний амьдрал, орчин тойронд нь тулгарсан асуудлыг  дэлгэцнээ мөнхөлсөн бөгөөд хүүхэлдэйн кино ч байдаг байна. Түүнчлэн 1997 онд бүтэж байсан уг кинонд хөгжлийн бэрхшээлтэй иргэдийн хөдөлмөр эрхлэлт, нийгэмд дасан зохицох тал дээр дэмжлэг үзүүлэх зорилготой  “Самрын үр” нэртэй байгууллага анх хэрхэн байгуулагдаж байсан түүхээс дурдах гэнэ.

Сонирхуулахад, “Самрын үр” байгууллага нь одоог хүртэл ажилладаг бөгөөд Япон улсад энэ төрлийн иргэний нийгмийн байгууллага бүрэлдэхэд мэдэгдэхүйц нөлөөлсөн ажээ.