Попын домог болсон агуу дуучин Майкл Жексоны төрсөн өдөр өнөөдөр тохиож байна. Тэрээр 1958 оны наймдугаар сарын 29-ний өдөр Индиана мужийн Гэри хотод афро-америк гаралтай ажилчин гэр бүлийн 10 хүүхдийн найм дахь хүү болон мэндэлсэн юм. Майкл есөн настайдаа төрсөн ах, дүү нартайгаа хамтарч, “Жексоны 5” нэртэй хамтлаг байгуулж, Харлемын Аполло театрт анх удаа тайзнаа гарч байсан түүхтэй. Тэрээр хөгжмийн түүхэнд хэзээ ч үл мартагдах өөрийн түүхийг бүтээж чадсан агуу хүн билээ. 1982 онд гаргасан түүний “Thriller" цомог нь бүх цаг үеийн шилдэг цомог болж дэлхий дахина 50 сая хувиар борлуулагдаж байлаа. “Триллер”-ийн араас 1987 онд гарсан “Bad” цомог мөн түүнээс дутахааргүй олон хувиар борлогдсон юм. 1991 онд гаргасан “Dangerous” цомог мөн л олныг шуугиулж байлаа. Мэдээж 1995 онд гаргасан “History” цомгийг дурьдахгүй байж болохгүй. Харин 2001 онд гаргасан "Invincible" цомгийг түүний гаргасан хамгийн муу бүтээл хэмээн тооцдог. Гэвч энэ үед түүний уран бүтээл гэхээсээ илүүтэй хувийн амьдралыг нь олонд дэлгэж, түүн рүү хэвлэл мэдээллийн байнгын дайралт хийдэг байсан нь ийнхүү нөлөөлсөн ч байж болох. Тэр ердөө тавхан настайгаасаа олонд танил болж эхэлсэн юм. Жексоны ах дүү тавуул гаргасан “I Want You Back," "ABC," and "I"ll Be There” цомгууд нь тухайн үедээ шуугиан тарьж байлаа.

Попын домогт хаан, дэлхий нийтийн хайртай дуучин Майкл Жексон ид хийж бүтээх 50 насандаа харамсалтайгаар хорвоог орхиж, хайртай гэр бүл, үнэнч шүтэн бишрэгчдээ уй гашууд автуулсан билээ.

Майкл Жексоны 54 насны төрсөн өдрийг тохиолдуулж, АНУ-ын Вашингтон D.C-ын клубууд цуврал арга хэмжээг зохион байгуулж байна. Өнгөрсөн даваа гаригт түний дурсгалын хүндэтгэн анх удаа “DJ Jahson’s” нэртэй энэ жилийн хамгийн том үдэшлэгийг зохион байгуулж, түүний 70, 80 оны хитийг эгшиглүүлжээ. Тэрхүү үдэшлэгт ирсэн зочид түүний дахин давтагдашгүй хит дуунуудыг даган дуулж, бүжиглэн попын хааныг эргэн дурссан аж. Харин ирэх баасан гаригт “U Street Music Hall’s” нэртэй “Michael Jackson is Still Alive” буюу Майкл Жексон амьд нэртэй шоуг хийх гэж байгаа юм. Мөн тус өдөр Вашингтоны Howard театрт Жексоны үе үеийн хит видеонуудаар хийсэн сонгодог видео төслийн нээлтийг хийх нь ээ.

Хэдийгээр Майкл Жексон энэ хорвоогоос халин одсон ч түүний дахин давтагдашгүй бүтээлүүд эгшиглэсээр байх болно. Тиймээс тэр бидний сэтгэлд зүрхэнд үүрд мөнх үлдэх билээ.