131 дэх жилдээ зохиогдож буй “Америкийн нээлттэй тэмцээн” наймдугаар сарын 27-нд эхэлсэн. Эмэгтэйчүүдийн ганцаарчилсан төрлийн нэгдүгээр тойргийн тоглолт өндөрлөж хоёрдугаар тойрогт өрсөлдөх (1/64) теннисчид тодроод байгаа бөгөөд эхний даваанд дээгүүр өрсөлдөх магадлалтайд тооцогдож байсан хэдэн хэдэн теннисчин тэмцээнийг орхиод байна.

Шилдэг теннисчдээс Данийн Каролина Возняцки хоёрдугаар тойрогт шалгарч чадаагүй нь том дуулиан болоод байна. Тэрбээр тус тэмцээнд наймд эрэмбэлэгдэн тоглосон бөгөөд чансааны 90-д эрэмбэлэгдсэн Румын Ирине-Камелии Бегуд 2:6, 2:6-ийн харьцаагаар ялагдсан байна. Энэхүү тоглолт 1 цаг 21 минут үргэлжилжээ. Возняцки Лондонгийн олимпид 1/8-ийн шигшээд АНУ-ын Серена Уильямст 0:6, 3:6-аар ялагдсан байна. 2009 онд “Америкийн нээлттэй тэмцээн”-ий шигшээд шалгарч Белгийн Клийстерт ялагдаж байсан ч, 2010 оны төгсгөлд (2010.10.11) дэлхийн чансааг тэргүүлсэн Возняцкигийн хувьд “Их дуулга”-ын нэгдүгээр тойргоос хасагдаж байсан удаагүй билээ. Өдгөө дэлхийн чансааны есд эрэмбэлэгдэж буй түүний хувьд оны төгсгөлд болдог шилдэг наймын тулаанд орох эсэх нь улам хүнд боллоо. Тэрбээр 2010 оны "WTA Championships"-д түрүүлж байсан юм.

Возняцкиг буулган авсан Румын теннисчин хоёрдугаар тойрогт Испаний теннисчинтэй оноолт таарчээ.

Мөн чансааны 16-д эрэмбэлэгдсэн Германы Сабине Лисицки цагаан хуудсаар орсон Румыний Сорана Кирстеаг барсангүй. Тус теннисчдийн тоглолт гурван үе үргэлжиж Лисицки эхний үед 6:4-өөр илүүрхсэн ч сүүлийн хоёр үед 2:6, 2:6-гаар ялагдав.

ОХУ-ын Елена Веснина чансааны 32-т эрэмбэлэгдсэн Хятадын Пэн Шуайг 7:6, 6:1-ээр буулган авснаар хоёрдугаар тойрогт нутаг нэгт Макароватой (42) оноолт таарчээ.

Эмэгтэйчүүдийн хоёрдугаар тойргийн хамгийн сонирхолтой тоглолт тэмцээнд түрүүлэх магадлалтай тамирчдын тоонд зүй ёсоор багтаж буй Германы залуу теннисчин Ангелик Кербер (6), АНУ-ын Винус Уильямс (47) нарын хооронд өрнөнө. Тэдний хувьд хувьд Лондонгийн олимпийн гуравдугаар тойрогт оноолт таарч Кербер 7:6, 7:6-аар ялалт байгуулсан байна. Керберийн хувьд энэ жил ОХУ-ын Мария Шарапова, Хятадын Ли На, Белгийн Клийстерс, Чехийн Квитова, АНУ-ын Серена Уильямс гээд гол өрсөлдөгчдөө хожсон. Тэгэхээр энэ дуэльд түүнийг илүүрхэнэ гэдэгт олонхи итгэлтэй байна. Тэрбээр WTA-н тэргүүн тоглогч, Беларусын Азаренка, хоёрт эрэмбэлэгдэж буй Польшийн Радванска нарыг л хожиж үзээгүй байна.

Эрэгтэйчүүдийн нэгдүгээр тойрогт том сенсаци гарсангүй. Швейцарийн Рожер Федерер (1), Сербийн Новак Жокович (2), Их Британы Энди Муррей (4), Чехийн Томаш Бердых (6), АНУ-ын Энди Роддик (20) нарын шилдэгүүд учраагаа буулгаад байна. Эрэгтэйчүүдийн нэгдүгээр тойргийн тоглолт хараахан дуусаагүй байна.