МАХН-МҮАН-ын Шударга ёс эвслийн бүлэг ээлжит хуралдаанаараа 11 дэх гишүүний тангаргыг өргүүлж ажилд нь оруулах ёстой гэсэн асуудлыг хэлэлцсэн байсан юм. Гэхдээ 11 дэх гишүүн хэн байх вэ гэдэгт тодорхой хариулт өгөөгүй ч Төрийн ордонд дуулдаж буй мэдээллээр бол тус эвслээс намын жагсаалтаар УИХ-ын сонгуульд нэр дэвшсэн Татварын ерөнхий газрын дарга асан Ц.Оюунбаатарыг “Шударга ёс” эвслийнхэн тангараг өргүүлэхгүй байхаар шийдсэн гэх мэдээлэл тархаад байна.

Харин түүнийг Татварын ерөнхий газрын даргаар эргүүлэн  томилох тохироог нам дотроо хийж буй бололтой. Татварын ерөнхий газрын даргыг Сангийн сайд мэдэж томилно. Сангийн сайдын албыг эдүгээ УИХ-ын гишүүн Ч.Улаан хашиж байгаа. Тиймээс Ц.Оюунбаатарыг дээрх албанд томилоод оронд нь 11 дэх гишүүнийг оруулж ирж, тангараг өргүүлнэ гэх мэдээлэл газар авч байна.

Харин 11 дэх гишүүн хэн байх вэ гэдэг одоо ч таавар дагуулсан хэвээр байгаа юм. Уг нь намын жагсаалтаа хөөвөл Ц.Оюунбаатар нь УИХ-ын гишүүн болох ёстой, гэвч эвслийнхэн өөр тоглолтод шилжсэн бололтой.