Путины хөрөнгийн талаар сөрөг хүчний лидерүүдийн нэг Борис Немцов шинэ илтгэл бэлтгэжээ. Тэрээр Путиныг тансаглан амьдарч байгаа атлаа бодит орлогоо нуун сонгогчдыг хуурсан гэж үзжээ.

Оросын Бүгд найрамдах нам-ПАРНАС-ын дарга нарын нэг Борис Немцов ба “Эв нэгдэл” хөдөлгөөний идэвхтэн Леонид Мартынюкийн хамт бэлтгэсэн Оросын ерөн­хийлөгчийн хө­рөн­­гийн талаар шинэ илтгэл “Шилтгээнүүд”, “Нисэхийн парк (онгоцнууд ба нисдэг тэргүүд)”, “Дарвуулт онгоц­нууд”, “Авто”, “Цагнууд” гэх зэ­рэг бүлгүүдээс бүрэлдсэн байна.

Илтгэлд бичсэнээр, Путины мэдэлд 20 орд харш, шилтгээн, өргөө байгаагийн ес нь түүний эрх барих хугацаанд босчээ. Харьцуулахад, АНУ ба ХБНГУ-ын тэргүүн нарын мэдэлд тус бүрт нь хоёр өргөө байдаг гэж Немцов, Мартынюк хоёр онцолсон байна.

Путины мэдэлд нийтдээ нэг тэрбум ам.дол­ларын өртөгтэй 43 онгоц, 15 нисдэг тэрэгнээс бүрэлдсэн нисэхийн парк, гурван тэрбум ам.доллараар үнэлэгдэх дөрвөн хөлөг онгоцтой флот байгаа бөгөөд авто машин, цагны баялаг цуглуулгатай гэнэ.

Путин жилийн орлогоо дөрвөн сая рубль гэж мэдүүлэг өгч сонгогчдыг хуурч байна. Харин өөрөө Персийн булан­гийн орнуудын ван шиг баян тансаг нөхцөлд амьдарч байна хэмээн илтгэлийг зохиогчид бичжээ.

Өмнөх илтгэлүүдээс ялгаа­­тай нь мэдээллийг гэрэл зур­гаар баяжуулж өгсөн гэнэ.
Путины хэвлэлийн төлөө­­­­лөгч Дмитрий Песков “КоммерсантЪ” сонинд ярих­даа ерөнхийлөгчийн хэрэг­лэж буй эд хөрөнгө нь бүгд улсын өмч гэсэн байна.