Наймдугаар сарын 27-ноос есдүгээр сарын 10-ны өдрүүдэд Туркийн Стамбул хотноо үргэлжлэх Дэлхийн шатрын 40-р олимпиадад оролцох Монголын шатарчид эх орноосоо морджээ. Монголын баг эрэгтэй, эмэгтэй тус бүр таван тамирчны бүрэлдэхүүнтэй бөгөөд  Дасгалжуулагч, албаны хүмүүс нийлээд 14 хүний бүрэлдэхүүнтэйгээр Монголын баг Стамбулыг зорьжээ.

Эрэгтэй багийн бүрэлдэхүүнд ОУ-ын мастер Б.Гүндаваа, Их мастер Д.Шаравдорж, Их мастер Ц.Батчулуун, ФИДЕ мастер Г.Мөнхгал, ФИДЕ мастер М.Гүнбаяр нар багтсан байна. Тамирчдыг Гавьяат дасгалжуулагч П.Жигжидсүрэн дасгалжуулна. Харин эмэгтэй багт Их мастер Б.Мөнгөнтуул, Их мастер Т.Батчимэг, ОУ-ын мастер Д.Янжиндулам, ОУ-ын мастер Б.Анхчимэг, ФИДЕ мастер С.Отгонжаргал нар багтжээ. Эмэгтэй шатарчдын дасгалжуулагчаар МШХ-ны ерөнхий нарийн бичгийн дарга Ц.Батсайхан ажиллана.

Монголчууд Дэлхийн шатрын олимпиадад 1956 оноос хойш оролцож эхэлсэн бөгөөд 1960 онд Гавьяат тамирчин Л.Мягмарсүрэн ширээнээсээ алтан медаль, 1964, 1970 онд ОУ-ын мастер Т.Үйтүмэн алт, мөнгөн медаль, 2000,2002 онд ФИДЕ мастер З.Бямбаа мөнгө, хүрэл медаль, 2004 онд Б.Хатанбаатар, Ц.Батцэцэг нар хүрэл медалиар энгэрээ мялааж байжээ. Манай шатарчид Дэлхийн шатрын олимпиадад 20 удаа оролцохдоо 1970 онд 60 орны эрчүүдээс 16-р байр, 1990 онд 64 орны эмэгтэйчүүдээс 12-рт шалгарч байжээ.