Засгийн газар төрийн албан хаагчдын албан хэрэгцээнд ашиглаж байгаа компьютерийг интернетээс тусгаарлах, тухайн компьютерээс мэдээлэл хуулах, гадагш гаргах эх үүсвэр, оролтыг хаах, шаардлагатай мэдээллийг зөвхөн албаны электрон шуудангийн хаягаар хүлээн авах боломж бий болгох, төрийн байгууллагууд дахь утасгүй интернетийн бүсийг Төрийн ордноос бусад газарт хааж, тодорхой зөвшөөрсөн байршлуудад ашиглах нөхцлийг бүрдүүлэхээр Засгийн газрын өчигдрийн хуралдаанаас тогтлоо.

Ингэснээр төрийн албан хаагчид ажлын цагаар интернетээр “зугаалах”-аа больж, хөдөлмөрийн бүтээмж нь нэмэгдэн, цаг ашиглалт сайжирна. Мөн төрийн 80 гаруй байгууллага хоорондоо сүлжээгээр мэдээлэл солилцох боломж бүрдэж, төрийн мэдээллийн аюулгүй байдал хангагдах юм. Үүнтэй холбоотой дүрэм, журмыг боловсруулах, удирдлагаар хангах, хөрөнгийн асуудлыг шийдвэрлэх зэргийг холбогдох сайд, агентлагийн дарга нарт даалгасан байна гэж Засгийн газрын хэвлэл, мэдээллийн албанаас мэдээллээ.