Түүхийн үе бүрт залуучуудын идэвхитэй хөдөлгөөн, хүсэл тэмүүлэл нь эх оронд шинэчлэл, ардчилалыг авчирч, эх орны хөгжлийн гол хүч, түшиг тулгуур, тусгаар тогтнол, ардчилал, эрх чөлөөний баталгаа болж ирсэн билээ.
1921 оны 8-р сарын 25-нд “Бошгыг халах Залуучуудын эвлэл” нийслэл хүрээнд 17 хүний бүрэлдэхүүнтэй үүсч, Ерөнхий хороогоо байгуулснаар Монголын Залуучуудын хөдөлгөөн үүсч хөгжсөн түүхтэй. Улмаар 1991 онд ардчилсан хувьсгалын давалгаанаар Монголын Хувьсгалт Залуучуудын Эвлэлийн залгамжлагч Монголын Залуучуудын Холбоо мэндэлжээ.
1996 онд Улсын Их Хурал Монголын Залуучуудын эв нэгдлийн баяр “Залуучуудын өдөр”-ийг жил бүрийн наймдугаар сарын 25-нд тэмдэглэж байх тогтоол гаргасан нь төр засаг залуусынхаа хүсэл, зорилгыг дэмжиж байдгийн нэг илэрхийлэл.
Монголын нийт залуучууд маань энэ өдрийг үр бүтээлтэй өнгөрүүлж, дэлхийн үе тэнгийнхэнтэйгээ хөл нийлүүлэн урагшлахын өлзийтэй ерөөлийг дэвшүүлье.