“21 дүгээр зуун дахь Монгол Улс, Япон улсын хүн ба байгалийн зэрэгцэн оршихуйн эрх бүхий бүс нутгийн соёлын солилцоо” сэдэвт чуулга уулзалт маргааш 14.30 цагт Гадаад харилцааны яамны “Зөвшилцөл” танхимд болох гэж байна. Энэ нь Монгол Улс, Япон Улсын хооронд дипломат харилцаа тогтоосны 40 жилийн ойн хүрээнд болох бөгөөд Монгол, Японы харилцааг дэмжих “Түншийн холбоо” нийгэмлэг, Япон Улсын Ооита мужийн Хүний нөөцийн сургалт, бүс нутгийн солилцооны нийгэмлэгээс хамтран зохион байгуулах ажээ. Чуулга уулзалтад Монгол Улсаас Япон Улсад суугаа Онц бөгөөд бүрэн эрхт элчин сайд С.Хүрэлбаатар, Япон Улсаас Монгол Улсад суугаа Онц бөгөөд бүрэн эрхт элчин сайд Т.Шимизү, ГХЯ-ны Азийн газрын захирал, Улаанбаатар дахь Монгол Улсын элчин сайдын яамны ажилтнууд, Ооита-Монголын найрамдлын нийгэмлэгийн гишүүд, Ооита мужийн хэвлэл мэдээллийн байгууллагын төлөөлөгчид оролцох юм байна.

1989 онд Монголын Энх тайван, найрамдлын  байгууллагуудын холбооны Д.Билэгт тэргүүтэй төлөөлөгчид Япон Улсын Ооита мужид,  2002 оны 8 дугаар сард Ооита мужийн засаг дарга асан Хирамацү Морихико тэргүүтэй төлөөлөгчид Монгол Улсад айлчилснаар ийнхүү хамтын ажиллагааны эхлэл тавигджээ. Оиита-Монголын найрамдлын нийгэмлэг 1986 онд үүсгэн байгуулагдсан байна.  Түүнээс хойш Монголын хараагүй, дүлий иргэдийн нийгэмлэгт ачааны машин, суудлын машин, хувцас хэрэглэл, товч хийдэг тоног төхөөрөмж бэлэглэх, Баянхонгор аймгийн Шаргалжуут тосгоны 250 хүүхдийн дотуур байртай дунд сургуулийн барилгын өргөтгөлд хөрөнгө оруулалт хийх,  Ооита-Баянхонгорын эмэгтэйчүүдийн чуулга уулзалт зохион байгуулах, Баянхонгор аймгаас 100 гаруй хүнийг Япон Улсад урьж ногоо тарих, цагаан идээ боловсруулах,  шавар эдлэл хийх зэрэг хэд хэдэн салбарт үйлдвэрлэлийн дадлага хийлгэх зэргээр хамтын ажиллагааг хөгжүүлсээр иржээ.