Гэрлэх ёслолын ордны дарга Х.Оюунчимэг, тус ордны ерөнхий нягтлан бодогч Г.Шүрэнцэцэг нарыг албан тушаалын байдлаа урвуулан ашигласан хэмээн АТГ-т шалгаж эхэлсэн байна.  Тэднийг албан тушаалын байдлаа урвуулан ашиглаж, байгууллагад 23 сая 750 мянган төгрөгийн хохирол учруулсан хэмээн Эрүүгийн хуулийн тусгай ангийн 150.3, 263.2-т заасан зүйл ангиар эрүүгийн хэрэг үүсгэсэн байна. Энэ талаар АТГ-ын эх сурвалжаас тодруулахад “Мөрдөн байцаалтын шатанд яваа. Тиймээс дэлгэрэнгүй мэдээлэл өгөх боломжгүй” гэв.

Энэ хэргийн талаар гэрлэх ёслолын ордны дарга Х.Оюунчимэгээс тодрууллаа.  

-Таныг АТГ-аас шалгаж эхэлсэн байна. Энэ талаар?

-Манайх “Кодак дурсамж” гэдэг хувийн гэрэл зургийн газартай гэрээгээр хамтран ажилладаг байсан юм. Гэтэл зурагчин н.Сүх-Очир гэгч залууг ажлын байранд архидан согтуурсан болохоор нь бид хамтран ажиллахаас татгалзсан юм. Тэгээд ч манайх улсын компанитай хамтран ажиллахаар болсон.  Тэр залуу үүнд хар санаж намайг АТГ-т шалгуулахаар хандсан юм билээ.

-Албаны 23 сая орчим төгрөгийг завшсан гэсэн гомдлын тухайд?

-30×40 хэмжээтэй гэрэл зурагнаас гарсан ашгийг намайг хувьдаа авсан гээд байгаа юм. Тэр мөнгийг бид ажилчдынхаа нийгмийн асуудалд зарцуулсан. Бүх баримт нь байгаа.