БНХАУ-ын Шэньжэнь, Гуанжоу зэрэг томоохон хотуудад өчигдөр олон мянган иргэдийг хамарсан эсэргүүцлийн жагсаал болжээ. Жагсагчдын зүгээс газар нутгийн маргаантай байгаа Сенкаку арлын асуудлаар Япон улс БНХАУ-тай эвээ олж, арлыг булаалдахаа болихыг шаардаж буй аж. Жагсаалтын үеэр тэд замдаа таарсан япон хоолны газар, автомашин гэх мэт тус улсад үйлдвэрлэсэн, тэдэнд хамаатай бүхнийг эвдэж, сүйтгэсэн байна. Мөн жагсагчид БНХАУ-ын төрийн далбаа барин жагсч, Японы төрийн далбаа бүхий зургуудыг шатааж, “Япон арлыг орхи” хэмээн орилцгоож байжээ. Түүнчлэн Сенкаку арлыг БНХАУ-д буцаан өгч, тэднээс уучлал гуйх ёстой гэсэн байна.

Жагсаалыг тараах гэсэн цагдаа нарын эсэрг тэд савтай ус шиджээ. Гэхдээ цагдаагийн байгууллагаас нэг ч хүнийг баривчлаагүй гэнэ.

Гуанжоу хотод болсон жагсаалын үеэр жагсагчид Японы консулын газрын ойролцоо цуглан, “Япон! Арлыг орхи” хэмээн хашхиралджээ. Харин Шанхайд жагсагчид “Японы эзэрхэг түрэмгийллийг устгая” гэсэн уриа, лоозон барин жагссан байна. Хонконгт ч мөн дээрхийн адил жагсаал болсон бөгөөд 200 гаруй хүн оролцсон гэнэ. Харин Ченду хотод жагсагчид Япон брэндийн хувцасны дэлгүүр рүү дайрчээ.

БНХАУ болон Япон улс нь Сенкаку арлыг тус тусын эзэмшилдээ авахаар маргаан үүсгээд байгаа юм. Тус арлыг БНХАУ эрт цагаас нутаг дэвсгэрийнх нь нэг хэсэг байсаар ирсэн гэж байгаа бол Япон улс 1890-ээд оноос тэр хавийн бүлэг эзгүй арлыг өөрийн эзэмшилдээ авсан хэмээн мэдэгдэж байгаа юм.