Монгол Улсын Ерөнхий сайд Н.Алтанхуяг өнөөдөр сайд нарын нэрийг УИХ-ын даргад өргөн мэдүүлэхдээ зөвхөн Ардчилсан намаас сайдад нэр дэвшигчдийг санал болголоо. Бидэнд олдсон мэдээллээр бол МАХН-МҮАН-ынхан болоод ИЗНН-ынхан энэ цаг мөчид намаасаа хэн, хэнийг Засгийн газрын гишүүнд нэр дэвшүүлэх асуудлаар тус бүртээ хуралдаж буй аж.

 “Шударга ёс” бүлгийнхний хувьд Сангийн сайдад хэнийг нэр дэвшүүлэх вэ гэдэгт нэлээд асуудал үүссэн гэх мэдээлэл байна, учир нь Ерөнхий сайдын хувьд Засгийн газрыг тогтвортой байлгахын тулд парламентын гишүүд дотроос сайд нарыг санал болгох ёстой” гэсэн байр суурь баримталж буй гэнэ.

Харин “Шударга ёс” эвслийн бүлгийнхний хувьд Сангийн сайдад МҮАН-ын дарга М.Энхсайханыг нэр дэвшүүлнэ гэх төлөвлөгөөг урьдчилан хийсэн байсан. Одоо үүнийгээ өөрчлөхөд хүрч буй гэх мэдээлэл  дуулдаж эхэллээ.

Харин ИЗНН-ын хувьд Байгаль орчин, ногоон хөгжлийн сайдад УИХ-ын гишүүн С.Оюун уу, эсвэл С.Дэмбэрэл гишүүнийг нэр дэвшүүлэх үү гэдгээ эцэслэх аж.