БНСУ-д хөдөлмөрийн гэрээгээр ажиллаж байгаад хугацаандаа нутаг буцан ирсэн,  дахин гэрээгээр ажиллах хүсэлтэй  иргэдээс солонгос хэлний төвшин тогтоох тусгай шалгалтыг компьютерт суурилсан тестийн аргаар хоёр дахь удаагаа авах гэж байна. Энэхүү шалгалтын бүртгэл өчигдөр эхэлсэн бөгөөд хоёр өдрийн дараах байдлаар 61 хүн бүртгүүлээд байгаа аж. Шалтгалтыг ирэх сарын 10-14-ний хооронд авах аж. Тус шалгалтад хамрагдахын тулд 2011.01.01-ээс хойш эх орондоо ирсэн иргэд бүртгүүлэх юм. Ийм иргэд одоогийн байдлаар 2600 гаруй байгаа гэнэ.

Бүртгүүлэгчдэд тавигдах шаардлага:

• 18-39 настай байх. Насыг тооцон гаргахдаа бүртгэл явуулах өдрийг барина.(1972 оны 08-р сарын 15-аас 1994 оны 08-р сарын 14-ний өдрийн хооронд төрсөн байх
• Хорих ялтай эсвэл түүнээс илүү хүнд ялтай гэмт хэрэгт холбогдоогүй байх
• БНСУ-аас албадан гаргах буюу тус улсыг орхин явах захирамж гаргуулж байгаагүй 
• Монгол Улсаас гарах эрхээ хязгаарлуулаагүй
• БНСУ-д хууль бусаар оршин сууж байгаагүй 
• БНСУ-ын ЭСЯ-нд виз мэдүүлээд татгалзсан хариу авч байгаагүй
• Эрүүл мэндийн хувьд өвчингүй байх /Элэгний В, С вирус, Сүрьеэ, БЗХӨ г.м/ 
• БНСУ-д ажиллаж байгаад хугацаандаа нутаг буцаж ирсэн байх /2011.01.01-нээс  хойш ирсэн иргэд/

Дашрамд дуулгахад, Монгол Улсын Нийгмийн хамгаалал хөдөлмөрийн яам, БНСУ-ын Хөдөлмөр эрхлэлт, хөдөлмөрийн яам хоорондын “Хөдөлмөр эрхлэх зөвшөөрөл олгох тогтолцооны дагуу БНСУ-д ажилчид илгээх тухай” харилцан ойлголцлын санамж бичгийн хүрээнд БНСУ-д хөдөлмөрийн гэрээгээр ажиллах хүсэлтэй иргэдээс солонгос хэлний төвшин тогтоох найм дахь удаагийн шалгалт энэ сарын 25-26-нд болох аж. Дээрх шалгалтын бүртгэл зургадугаар сарын 11-13-нд орон даяар явагдаж, нийт 6411 иргэн хамрагдсан байна. Шалгалтыг хаана, ямар байдлаар зохион байгуулах тухай энэ сарын 20-нд зарлах бөгөөд энэ тухай мэдээллийг Хөдөлмөрийн төв биржийн самбараас мөн харах боломжтой аж.

Дэлгэрэнгүй мэдээллийг www.hh.gov.mn, www.hudulmur.mn, www.monkor.net вэбсайтаас авч болно.