“Хас”
банк багийн спортыг дэмжин өсвөр үе, залуучуудыг спортоор хичээллүүлэх
үйлсэд дэмжлэг үзүүлэхээс гадна багийн төрлүүдийг эх орондоо мэргэжлийн
түвшинд хөгжүүлэхийг зорин, “Хасын Хүлэгүүд” сагсан бөмбөг болон
хөлбөмбөгийг багийг клубын зохион байгуулалтаар хөгжүүлэхийг зорин
ажиллаж байгаа билээ.

“Хасын
Хүлэгүүд”-ийн сагсчид Европын орнуудад аялан тоглолт хийгээд ирсэн бол
хөлбөмбөгчид нь үндэсний лигийн АШТ-д тун сайн оролцож байна.   Өнгөрсөн
долоо хоногт Батлан хамгаалахын их сургуулийн хөлбөмбөгийн талбайд
нэгэн сонирхолтой тоглолт болсон нь Үндэсний лигийн дөрвөн хүрэл
медальт, улсын болон хотын АШТ-д алт, мөнгө, хүрэл медаль хэдэнтээ
хүртэж байсан “Хасын Хүлэгүүд” баг Сингапурын “Космо” лигийн “Германы
бүх одод” багтай нөхөрсөг тоглолт хийлээ. Сингапурын баг 1970 аад оны
эхээр байгуулагдсан бөгөөд эх орондоо болдог сонирхогчийн тэмцээнүүдэд
өндөр амжилт гарган, хилийн чанадад ч хүч сорьж үзсэн туршлагатай баг
ажээ. Гэвч мэргэжлийн тоглогчид сонирхогчдоос ангид байдгийг “Хасын
Хүлэгүүд” харуулан, хурд хүчээрээ илүүрхэж байв. Энэхүү тоглолт гоол
оруулахдаа биш, оролцохдоо гэсэн уриан дор өрнөсөн. Сингапурын баг маш
сайн хаалгачаар мануулжээ. Тиймээс түүний хаалганд гоол оруулах амаргүй
байв. Үндэсний лигийн тэмцээнд өндөр түвшинд тоглох тэмүүлэлтэй “Хасын
Хүлэгүүд” бэлтгэл сургуулилтын түвшингээ харуулан, өрсөлдөгчийнхөө
хаалганд зургаан гоол оруулсан бол эсрэг талынхан нь манай багийн
хаалганд хоёр бөмбөг хийжээ.   

Тоглолтын
үеэр “Хасын хүлгүүд” клубийн ерөнхий менежер, “Хас” Банкны Бизнес
Үйлчилгээний Төв хариуцсан захирал Б.Еркинтэй уулзаж ярилцлаа. 

-“Германы бүх одод” багтай нөхөрсөг тоглолт хийх шийдвэрийг хэзээнээс гаргасан юм бэ? 

 -Өнгөрсөн
дөрөвдүгээр сард Сингапурын баг ажил хэргийн шугамаар манай улсад ирэх,
нөхөрсөг тоглолт зохион байгуулах санал тавьсныг бид дуртай хүлээж
авсан.  Энэхүү багийг танилцуулбал нутгийнхаа “Космо” лигт тоглодог юм
билээ. Сайн үйлсийн аян хийх зорилгоор гадаадын бусад орнуудад буяны
тоглолт хийж байсан туршлагатай баг.  

-Тус баг байгуулагдаад олон жилийн нүүр үзэж байгаа гэж сонссон. Тоглогчдын нас ахимаг юм шиг санагдлаа… 

-Тийм
ээ. Ямартай ч энэхүү Сингапурын сонирхогчдын “Космо” лигт өндөр амжилт
гаргаж байсан юм билээ. Манай тоглогчдын дэргэд насны хувьд ахимаг
боловч өндөр нуруутай байгаа биз. 

-Магадгүй манай хөлбөмбөгчид Сингапурт бэлтгэл хийх боломж бүрдэж ч болох юм…   

-“Хасын
Хүлэгүүд” гадаадын клубтэй нутагтаа анх удаа тоглож үзлээ.  Цаашид
харилцаа холбоогоо  улам гүнзгийрүүлж, нөхөрсөг тоглолт өргөн хүрээнд
зохион байгуулахыг төлөвлөлгүй яахав. Энэ бүх ажлыг бүтээхийн тулд наана
нь хийх зүйл их байна.  

-“Хас” банкнаас мэргэжлийн клубүүддээ ямар хэмжээний мөнгө зарцуулдаг вэ?
 
-Мөнгөн
дүнг шууд хэлэх нь юу юм. Гэхдээ манай удирдлагууд багийн спортыг эх
орондоо хөгжүүлэхийг зорилго болгодог учраас сагсан бөмбөг, хөлбөмбөгийн
мэргэжлийн багтай. Тамирчдадаа тодорхой хэмжээний цалин хөлс олгодог.
Талбайн хөлс, материлаллаг зүйлс гээд л зардал багагүй гардаг. Үүнийг
бид зардал гэхээс илүү нийгмийн хариуцлага гэж ойлгодог. Багийн спорт
хүнийг нийтэч болгодог. Хөлбөмбөгийн баг маань мэргэжлийн тоглогчдоос 
гадна хүүхдүүдийн дөрвөн насны ангилалтай. Ингээд бодохоор 120 гаруй
гишүүнтэй гэсэн үг.    

“Германы бүх одод” багийн тоглогч Флориан Шмит манай сурвалжлагчийн асуултад ийн хариулж байна. 

-Монголд ирж хөлбөмбөг тоглох хүсэл та нарт хэзээ төрсөн юм бэ? 

-Бид
танай улсад 12-уулаа ирсэн. “Хас” банктай дотно харилцаатайн дээр
хөлбөмбөгийн клубтэй тоглож үзэхийг эртнээс хүссэн юм. Зорилго маань
биелсэнд баяртай байна. 

-Өөр орнуудаар танай баг аялан тоглолт хийж байв уу? 

-Германчуудын
хувьд хөлбөмбөг үндэсний спорт. Сингапурт ч эрчимтэй хөгжиж байгаа. Бид
Тайланд, Итали, Испани Швейцарь, Шинэ Зеланд, Японд очиж тоглож
үзсэн.  

-Монголд хийсэн тоглолтын онцлог гэвэл? 

-Ялгаа
их байна. Нэгдүгээрт танай улс бидэнд маш таалагдлаа. Хүссэн газраа
хөлбөмбөг тоглох сайхан шүү. Өрсөлдөгч багийн залуучууд ч тун сайн юм.
Тиймээс их зүйл ойлгож авлаа. Мөн бизнесийн чиглэлээр “Хас” банктай
харилцаагаа улам өргөжүүлэх боломж бүрдэж байна.   

“Хасын хүлгүүд” багийн дасгалжуулагч Ц.Энхтөртэй цөөн хором ярилцлаа. 

-Юуны өмнө танай баг үндэсний лигийн АШТ-д ямар зорилгоор оролцож буйгаа ярина уу? 

-Үндэсний
лигийн хоёрдугаар тойргийн тоглолтууд тун удахгүй эхэлнэ. Манай
тоглогчид найман багаас дөрөвт жагссан байгаа. Дөрвөн жил дараалан хүрэл
медаль хүртсэн бидний хувьд  медальт байрт шалгарах, улмаар өнгөө
хувиргах зорилготой.   

-Нөхөрсөг тоглолтын талаар юу хэлэх вэ?  

-Энэхүү
тоглолтыг ерөнхий ивээн тэтгэгч “Хас” банк зохион байгуулсан. Цаашдаа
Сингапурын залуустай харилцаа тогтоох, өндөр ур чадвартай тоглогчийг
багтаа эслүүлэх алхам бүрдүүлж байгаа гэж ойлгож болох байх. 

-Та нар өрсөлдөгчийнхөө хаалганд хэдэн гоол оруулах зорилго тавьсан бэ? 

-Гол зорилго гоол оруулахдаа биш. Үүнийг үндэсний лигийн хоёрдугаар тойргийн бэлтгэлийн нэг чухал тоглолт гэж үзэж байна.