Нийслэлийн замаас өдөрт 15 мянган машиныг “хэмнэх” боломжтой гэж Нийслэлийн Засаг даргын дэргэдэх Иргэний танхимын хэлэлцүүлгийн үеэр хотын Ерөнхий менежер Б.Бат хэллээ. Нийслэл иргэний танхимтай ч өчигдөр анх удаа иргэдэд үүдээ нээж хэлэлцүүлэг өрнүүлжээ. Нийслэл, дүүргийн төрийн албан хаагчид нийтийн тээврийн хэрэгслээр үйлчлүүлбэл 15 мянган машин түгжрэлээс “хасагдаж”, зогсоол ч тэр хэрээр чөлөөлөгдөх юм байна.

Мөн иргэдийн зүгээс долоо хоногийн өдөр бүрээр машиныг тэгш, сондгой дугаараар нь ээлжлэн явуулдаг Бээжин хотын туршлагыг нэвтрүүлэх, одоогийн байдлаар Офицеруудын ордон-25 дугаар эмийн сангийн хооронд зөвхөн нэгдүгээр эгнээгээр нийтийн тээврийн хэрэгсэл явдгийг дэмжиж уг журмыг Эскадрилийн хөшөө хүртэл сунгаж мөрдөх зэрэг асуудлыг дэвшүүлснийг Нийсллэлийн Засаг дарга бөгөөд Улаанбаатар хотын захирагч Э.Бат-Үүл судалж үзэхээр болж ихэнхийг хэрэгжүүлэх боломжтой гэжээ.