Нийслэлийн иргэний танхимын анхны хуралдаан өнөөдөр болж, нийслэлийн зам засвар ажлыг түргэвчлэх, замын хөдөлгөөний түгжрэлийг бууруулах арга замыг сүвэгчиллээ. Хуралд нийслэлийн Засаг дарга бөгөөд Улаанбаатар хотын захирагч Э.Бат-Үүл, Улаанбаатар хотын Ерөнхий менежер Ч.Бат, нийслэлийн Авто замын газрын дарга Д.Од нар оролцов.

2012 онд нийслэлийн зам засвар, шинэчлэлтийн ажилд улсын болон нийслэлийн төсөв, Хөгжлийн банк, Замын сангийн санхүүжилтээр 70 орчим тэрбум төгрөг зарцуулаад байгаа аж. Хурлын үеэр Улаанбаатар хотын Ерөнхий менежер Ч.Бат “Нийслэлийн замын хөдөлгөөний ачааллыг бууруулах талаар авах зарим арга хэмжээний санал”-ыг дэвшүүлсэн юм. Тухайлбал, төрийн албан хаагчдыг автобусаар явуулах, төлбөртэй зогсоолын тоог нэмэх, худалдааны төвүүдийн цагийн хуваарьт өөрчлөлт оруулах, автомашины улсын дугаараас хамаарч явах замыг хязгаарлах зэрэг оновчтой саналуудыг дэвшүүлж байлаа.