Дорнод аймгийн “Дорнод” дээд сургуулийн санаачилгаар “Чингис хааны түүхэнд холбогдох Халх гол орчмын газар нутгийн судалгааны зарим асуудал” сэдэвт олон улсын эрдэм шинжилгээний бага хурал Халх гол суманд болж байна. Тус хурлыг “Дорнод” сургууль болон Халхгол сумын “Ялалт” музей хамтран зохион байгуулж байгаа аж. Их эзэн Чингис хааны мэндэлсний 850 жилийн ой, Монголын ард түмний оюуны их өв “Монголын нууц новчоо” зохиогдсоны 772 жилийн ойг тохиолдуулан Дорнод аймгийн нутагт байх түүхэн дурсгалт газруудын судалгааг эрчимжүүлэх, Халх гол бүс нутгийг түүхэн аялал  жуулчлалын бүс нутаг болгох, гадаад дотоодын эрдэмтэн судлаачдын төлөөлөгчдийг МНТ-нд дурдагдсан Дорнод аймгийн зарим нутагт байгаа голлох үйл явдал өрнөсөн түүхэн газар нутагтай танилцуулах, түүхэн судалгааг олон нийтийн хүртээл болгох үндсэн зорилготой аж.

Хуралд БНХАУ, ОХУ, БНСУ болон Монгол Улсын эртний түүх, угсаатан судлаач эрдэмтдийн 28 төлөөлөгч оролцож, илтгэл тавьж, хэлэлцүүлэг өрнүүлэх аж. Мөн ШУА-ийн Хэл зохиолын хүрээлэн, Археологийн хүрээлэн Монголын Залуу эрдэмтдийн холбоо, Буриад судлалын акедими, ОХУ-ын Буриад улсын ШУА-ийн Сибирийн салбарын эрдэмтэд, БНХАУ-ын Хөлөнбуйр аймгийн Хөлөнбуйр дээд сургууль, ӨМӨЗО-ны “Одон” телевизийн найруулагч зураглаачид, Шинэ барга Зүүн хошууны албаны хүмүүс,  БНСУ-ын судлаач, зохиолчид КВS телевизийн групп, Улаанбаатар дээд сургуулийн эрдэм шинжилгээний тусгай баг, эрдэмтэн судлаачид, МУБИС-ийн эрдэмтэд оролцож буй ажээ. Хурал гурав хоног үргэлжлэх юм байна.