УИХ-ын гишүүн З.Баянсэлэнгэ нарын дөрвөн хүнд холбогдох хэргийг шүүх хурал өнөөдөр 11.30 цагт Чингэлтэй дүүргийн шүүхэд эхэлсэн ч шүүх бүрэлдэхүүн хурлын товыг хойшлууллаа. Түүнтэй хамт  МАХН-ын гишүүд болох М.Амартүвшин, Я.Мөнхсайхан, Д.Шонхоо нар шүүгдэж байгаа юм. Хурлын эхэнд шүүгдэгчид тус бүртээ өмгөөлөгч авах хүсэлтээ шүүх бүрэлдэхүүнд гаргасан.  Уг хүсэлтийг шүүх бүрэлдэхүүн хүлээн авч, шүүх хурлыг энэ сарын 29-нийг хүртэл хойшлууллаа. З.Баянсэлэнгэ нар дундаа хоёр өмгөөлөгчтэй шүүх хуралд оролцсон юм.

Хуралд шүүгчээр И.Ганбат, улсын яллагчаар Ц.Хашбаатар нар оролцов. Мөн хурал эхлэхэд шүүх бүрэлдэхүүн УИХ-ын гишүүн З.Баянсэлэнгийг Эрүүгийн хуулийн 230.1-т заасан үндэслэлээр буруутгаж байгааг танилцуулсан юм. 230.1-д Төрийн албан хаагчийг хуулиар хүлээсэн үүргээ гүйцэтгэж байхад эсэргүүцсэн буюу хүч хэрэглэсэн бол хөдөлмөрийн хөлсний доод хэмжээг наяас нэг зуу дахин нэмэгдүүлсэнтэй тэнцэх хэмжээний төгрөгөөр торгох, хоёр зуун тавин нэгээс гурван зуун тавин цаг хүртэл хугацаагаар албадан ажил хийлгэх, гурваас дээш зургаан сар хүртэл хугацаагаар баривчлах, эсхүл хоёр жил хүртэл хугацаагаар хорих ял шийтгэнэ гэж заасан байна.

Хэргийг сануулахад, З.Баянсэлэнгэ нар өнгөрсөн оны арваннэгдүгээр сард Ерөнхийлөгч асан Н.Энхбаярын туслах Б.Тулгыг УМБГ-аас баривчлах үеэр Нийслэлийн прокурорын газрын хяналтын прокурор О.Мөнхбаатарын биед халдсан шалтгаанаар эрүүгийн хэрэгт холбогдсон юм.