Португалийн Гуэмараес хотноо наймдугаар сарын 19-26-нд болох шатрын оюутны дэлхийн аварга шалгаруулах 12 дахь удаагийн тэмцээнд оролцох Монголын баг бүрэлдэхүүн тодорчээ. Дэлхийн 20 орчим 200 гаруй шатарчин өрсөлдөх тус тэмцээнд Монголын оюуны спортынхон эрэгтэй, эмэгтэй ганцаарчилсан болон багийн төрөлд өрсөлдөх юм байна.

2010 онд Швейцарийн Цюрих хотноо болсон оюутны дэлхийн аваргад амжилттай оролцож, хувийн төрөлд их мастер Б.Мөнгөнтуул алт, мөн багийн төрөлд аваргалж байсан Монголын шатарчдаас энэ удаад эмэгтэйчүүдийн багт олон улсын мастер А.Энхтуул, дэд мастер Б.Билэгжаргал, дэд мастер С.Сарантунгалаг, дэд мастер Б.Ану нар, харин эрэгтэйчүүдээс Б.Ариунбүүвэй, Б.Галмандах, Р.Амгаланбаатар нар өрсөлдөх аж. Тэдний хувьд 2012 оны оюутны улсын аварга шалгаруулах тэмцээнд оролцож, эрхээ авчээ. Баг тамирчдын дасгалжуулагчаар Монгол Улсын Гавьяат тамирчин дасгалжуулагч, Олон улсын мастер П.Жигжидсүрэн шатарчдаа удирдан оролцох юм байна. Шатарчид өдгөө Хандгайт дахь амралтын баазад бэлтгэлээ базааж байгаа ажээ.

Монголын оюутны шигшээ баг нь анх 1994 онд Болгарын Софи хотноо болсон оюутны ДАШТ-нээс ОУМ Ц.Батцэцэг мөнгөн медаль, 2000 онд Болгарын Варна хотноо зохиогдсон тэмцээнд багаараа хүрэл медаль, 2002 онд Улаанбаатар хотноо болсон оюутны дэлхийн аваргын 7 дугаар тэмцээнд Монголын баг хүрэл,  хувийн төрөлд ОУМ Б.Анхчимэг хүрэл медаль, 2008 онд ОХУ-ын Новокузнецк хотноо зохиогдсон ДОАШТэмцээнд багаараа хүрэл медаль тус тус хүртэн амжилттай оролцож байсан юм. Мөн 2011 онд БНХАУ-ын Шинжинь хотноо болсон “Универсиад” наадмын шатрын тэмцээнд их мастер Б.Мөнгөнтуул мөнгөн медаль хүртсэн билээ. Харин 2013 онд ОХУ-ын Казань хотноо болох Универсиад наадмын хөтөлбөрт шатрын төрөл дахин орсон юм.

Гүэмараес хот нь Португал улсын хойд хэсэгт Порто хотын ойролцоо оршдог ба 52 гаруй мянган хүн амтай, 23,5 км2 газар нутагтай үйлдвэржилт хөгжсөн хот юм. Португал нь оюутны спорт өндөр хөгжсөн улс бөгөөд 2 жил тутамд болдог оюутны дэлхийн аварга шалгаруулах олон удаагийн тэмцээнүүдийг амжилттай хүлээн авч явуулдаг бөгөөд энэ оны 7 сард заалны хөлбөмбөгийн оюутны ДАШТ зохиогдож өнгөрсөн юм.