Иракийн Курдууд эрчим хүчний эх үүсвэр байгуулах ажилд хамтрахаар БНСУ-ын компаниудтай гэрээ байгуулжээ. Энэ нь газрын тос олборлох гэрээний хүрээнд хийгдэж буй ажил гэнэ. Гэрээний дагуу БНСУ-ын “Posco Engineering and Construction” компани нь Эрбил хотод 3-6 сарын хугацаанд 300 мВт хүчин чадал бүхий уурын эрчим хүчний байгууламж, мөн Сулеймания хотод найман сарын дотор 400 киловольтын трансформатор барьж, байгуулах аж.

Курдын бүс нутагт найман цооногоос газрын тос олборлохоор 2008 онд байгуулсан гэрээний дагуу БНСУ-ын “Korea National Oil Corp” буюу KNOC нь дээрх төслийг санхүүжүүлэх юм байна. KNOC нь дээрх найман цооногоос нийт 7,2 тэрбум баррель газрын тос олборлох тооцоотой байгаа аж. 2008 онд үзэглэсэн гэрээ ёсоор KNOC нь газрын тос олборлолтоос олсон ашгийн тодорхой хувийг дэд бүтцийн төсөлд зориулах үүрэгтэй юм байна.

Багдад дахь Иракийн төв Засгийн газрын зүгээс газрын тостой холбоотой Курдуудын дээрх гэрээг эсэргүүцэн, шүүмжилж буй аж.