УИХ-ын Төсөв, Эдийн засгийн байнгын хороод хуралдаж, даргаа сонгох асуудлыг хэлэлцлээ. Төсвийн байнгын хороог эрхэм гишүүн Ч.Улаан даргалж, бие даагч гишүүн Ц.Даваасүрэнг 100 хувийн саналаар Төсвийн байнгын хорооны даргад нэр дэвшүүлэхээр шийдэж, УИХ-ын чуулганд хэлэлцүүлэхээр тогтов. Тэрбээр өмнөх УИХ-д мөн Төсвийн байнгын хороог тэргүүлж байсан юм.

Үүний дараа Эдийн засгийн байнгын хороо залгуулан хуралдаж, эрхэм гишүүн С.Дэмбэрэл даргаллаа. Түүгээр АН-ын бүлгийн гишүүн Б.Гарамгайбаатарыг мөн л 100 хувийн саналаар Эдийн засгийн байнгын хорооны даргаар нэр дэвшүүлэхээр болов. Энэ үеэр гишүүн Д.Ганхуяг химийн аж үйлдвэрийг Монголд хөгжүүлэх хэрэгтэй гэж байсан юм. Ийнхүү хоёр байнгын хороо хуралдаж, дарга нараа томилуулахаар УИХ-ын чуулганд хэлэлцүүлэхээр тогтлоо.